धुलिखेल । बिरामी बोक्ने एम्बुलेन्सबाट लागुपदार्थ कारोबारको कालो धन्दा भएको पाइएको छ ।
महोत्तरी जिल्लाको बर्दिबासबाट काठमाण्डौ तर्फ आएको ज. १ च. १९०८ नम्बरको एम्बुलेन्सलाई शंका लागी प्रहरीले चेक जाँच गर्ने क्रममा चालकको सिट पछाडि लुकाइ ल्याएको अवैध लागु औषध फेला परेको प्रहरीले जनाएको छ।
बिहिबार राती ९ बजेको समयमा जिल्ला काभ्रेपलाञ्चोक, रोशी गा.पा. वडा नं.९ स्थित इलाका प्रहरी कार्यालय मंगलटार काभ्रेबाट प्र.नि. कृष्ण गिरीको कमाण्डमा खटिएको प्रहरी टोलीले अवैध लागुऔषध बोकेको एम्बुलेन्सलाई नियन्त्रणमा लिएको हो।
बिशेष सूचनाको आधारमा वि.पि. राजमार्ग सडकमा आवत जावत गर्ने सवारी साधनहरु नियमित चेकजाँच गर्ने क्रममा महोत्तरी जिल्लाको बर्दिबासबाट काठमाण्डौतर्फ सेतो रगतको कम भएको बिरामी लिई आएको जिल्ला धनुषा, धनुषाधाम न.पा. वडा नं. ६ हरिपुर बस्ने बर्ष ४४ को चालक सुरेश मिझारले चलाई ल्याएको सुनौलो सोनौल-२ महोत्तरी द्वारा संचालित ज. १ च. १९०८ नम्बरको एम्बुलेन्सलाई शंका लागी चेक जाँच गर्ने क्रममा चालकको सिट भन्दा पछाडि पट्टि Cloud Star Bee लेखिएको रातो रंगको जेब्रा झोलाभित्र NOOPHIN लेखिएको 2ml को १००० एम्पुल, अर्को हरियो रंगको जेब्रा झोलाभित्र रहेको Real Burst Mango लेखिएको कार्टुनभित्र DIAZEPAM लेखिएको 2ml को १००० एम्पुल र सोही झोलामा रहेको काटुनभित्र PHENERGAN लेखिएको 2ml को १००० एम्पुल गरि जम्मा ३००० एम्पुल लागु औषध फेला पारिएको प्रहरीले आज पत्रकार सम्मेलन गरी जानकारी दिइएको छ।
एम्बुलेन्स चालक सुरेश मिझारलाई पक्राउ गरी शुक्रबार जिल्ला अदालत काभ्रेपलाञ्चोकबाट ५ दिन म्याद थप भई अनुसन्धान थालिएको प्रहरी नायब उपरीक्षक (प्रनाउ) मिन बहादुर घलेले बताए । एम्बुलेन्सबाट गैरकानुनी सामान लगिँदैछ भन्ने सूचनाका आधारमा रोकेर जाँच गरिएको प्रहरीले जनाएको छ । यो कारोबारमा अन्य पनि संलग्न भएका हुनसक्ने प्रहरीको अनुमान छ ।
