काठमाडौं। कवि तारा सुवेदीको पहिलो कवितासङ्ग्रह ‘अनुभूतिका महक’ आइतबार राजधानीमा आयोजित एक समारोहबीच लोकार्पण गरिएको छ।
नेपाल स्रष्टा समाजको आयोजनामा सम्पन्न कार्यक्रममा अग्रज साहित्यकार शैलेन्द्र साकार, श्रीओम श्रेष्ठ ‘रोदन’, प्रा.डा. कृष्णप्रसाद दाहाल, प्रा.डा. लक्ष्मणप्रसाद गौतम, पवन आलोक तथा कवि तारा सुवेदीले संयुक्त रूपमा कृतिको लोकार्पण गरेका हुन्।
कार्यक्रमका प्रमुख अतिथि शैलेन्द्र साकारले नेपाल स्रष्टा समाजमा सँगै काम गरेका पुराना दिनहरू स्मरण गर्दै सुवेदीलाई मिलनसार, सक्रिय र लगनशील स्रष्टाका रूपमा आफूले पाएको बताए।
लोकार्पित कृतिमाथि समीक्षा गर्दै प्रा.डा. कृष्णप्रसाद दाहालले सुवेदी करिब डेढ दशकदेखि कविता सिर्जनामा सक्रिय रहेको उल्लेख गर्दै यो पहिलो कृति भए पनि परिपक्व सिर्जनाका कारण पहिलो जस्तो नलाग्ने धारणा व्यक्त गरे। उनका अनुसार सङ्ग्रहका कविताले पाठकको मन जित्ने सामर्थ्य राख्छन्।
कार्यक्रममा अग्रज कथाकार भागिरथी श्रेष्ठ, प्रा.डा. लक्ष्मणप्रसाद गौतम, पवन आलोक, विवश पोखरेल, साहित्यिक पत्रकार सङ्घका अध्यक्ष राधेश्याम लेकाली, विधान आचार्य तथा चन्द्रप्रसाद भट्टराईलगायतले शुभकामना मन्तव्य व्यक्त गरेका थिए।
सो अवसरमा कवि सुवेदीले आफ्नो लेखनयात्रा र सिर्जनाका अनुभूतिहरू साझा गरेका थिए। लोकार्पित कृतिबाट विधान आचार्य, राधेश्याम लेकाली, मणि लोहनी, प्रकाश घायल, रञ्जना निरौला र खुशी अधिकारीले कविता वाचन गरेका थिए।
श्रीओम श्रेष्ठ ‘रोदन’को अध्यक्षतामा सम्पन्न कार्यक्रमको सञ्चालन प्रदीप सापकोटाले गरेका थिए भने डा. शान्तिमाया गिरीले स्वागत मन्तव्य व्यक्त गरेकी थिइन्।
