ललितपुर — सन्तानप्रतिको माया कति गहिरो हुन्छ भन्ने उदाहरण ललितपुर महानगरपालिका–४, मानभवनका पुष्करमान शाक्यको कार्यले देखाएको छ। दुई वर्षदेखि ह्वीलचियरमा जीवन बिताइरहेका आफ्ना ४१ वर्षीय छोराको स्वास्थ्य लाभको कामना गर्दै उनले काभ्रेपलाञ्चोकको धुलिखेल नगरपालिका–१ स्थित साङ्गे दोर्जे निङ्मा गुम्बालाई बुद्धको मूर्ति दान गरेका छन्।
शाक्यका छोरा सजिलमान शाक्य पुल्चोकस्थित होटल स्वायरको स्वीमिङ पुलमा करेन्ट लागेर गम्भीर घाइते भएका थिए। चिकित्सकीय उपचारकै क्रममा रहेका सजिलमानको शारीरिक अवस्थासँगै अभिभावकको भावनात्मक संघर्ष पनि निरन्तर चलिरहेको छ। यही गहिरो पीडा र धार्मिक विश्वासका बीच पिता पुष्करमानले “दान धर्म हो” भन्ने भावनासहित मूर्ति हस्तान्तरण गरेका हुन्।
शनिबार स्थानीय लामा गुरुहरू, बिहारका भिक्षु, र गुम्बाबाट आएका प्रतिनिधिहरूको उपस्थितिमा धार्मिक विधिअनुसार पूजा सम्पन्न गरी मूर्ति हस्तान्तरण गरियो। मूर्ति समाजसेवी पञ्चलाल घिसिङ र व्यवसायी कान्छा तामाङ नेतृत्वको टोलीले ग्रहण गरेका हुन्।
आस्थाबाट उत्पन्न आशा
पुष्करमान शाक्यले मूर्ति हस्तान्तरणपछि भने, “हामीलाई विश्वास छ — जब धर्म र दानको मार्गमा हिँडिन्छ, तब भगवानले हामीलाई साथ दिनुहुन्छ। छोरा स्वस्थ होस् भन्ने कामनाले हामीलाई मूर्ति दान गर्न प्रेरित गर्यो।”
उनले थपे, “दान गर्नु भनेको माया, मोह र स्वार्थ त्याग्ने अभ्यास हो।”
तामाङ समुदायको बाक्लो बसोबास रहेको देविटार क्षेत्रमा बुद्धको मूर्ति नरहेको अवस्थामा मूर्ति दान गर्नुले धार्मिक वातावरण सृजना हुने र समुदायमा श्रद्धा बढ्ने विश्वास पनि शाक्यले व्यक्त गरे।
समाजसेवी घिसिङले शाक्य परिवारप्रति आभार व्यक्त गर्दै भने, “धर्म र करुणाको मार्गमा हिँड्नेहरूलाई भगवानले अवश्य हेरिरहनु भएको हुन्छ। हामी सबैको कामना छ — सजिलमानको स्वास्थ्य चाँडै सुधार होस्।”
हाल गुम्बामा मूर्ति प्रतिस्थापन गर्न थप दुई मूर्ति आवश्यक भएकाले ती प्राप्त भएपछि सम्पूर्ण मूर्तिहरू एकैपटक प्रतिस्थापन गरिने जानकारी पनि दिइएको छ।
सत्य भनेकै बुद्ध हुन अरु सबै कथा मात्रै हुन ब्याबसाय हुन।