बनेपा। लिन इन्टरनेशनल बोर्डिङ स्कुलले श्रीकृष्ण जन्माष्टमीको अवसरमा आज विद्यालय प्राङ्गणमा ३७० जना कन्या तथा कुमारको पूजा गरेको छ।
बनेपामा करिब १२० वर्षअघि देखि प्रत्येक वर्ष यही पर्वमा कन्या तथा कुमार पूजा हुँदै आएको छ। यस अवसरमा विद्यालयमा अध्ययनरत कक्षा नर्सरीदेखि कक्षा तीनसम्मका करिब ३७० बालबालिकालाई सहभागी गराएर कार्यक्रम आयोजना गरिएको हो।
विद्यालयका प्रबन्ध निर्देशक कृष्ण कुमार भण्डारी (शिशिर)ले बालबालिकालाई प्रत्यक्ष सहभागी गराएर पर्व, संस्कृति र सामाजिक परम्पराको अनुभव गराउने उद्देश्यले पूजा गरिएको बताए।
कार्यक्रममा विद्यालयको सञ्चालक समिति, प्रिन्सिपल, शिक्षक-शिक्षिका, अभिभावक तथा विद्यार्थीहरूको सहभागिता रहेको थियो। सो क्रममा बालबालिकालाई विभिन्न शैक्षिक सामग्री र धार्मिक परम्परा अनुसारका खानेकुरा वितरण गरिएको थियो।
