काभ्रेपलाञ्चोक । बेथानचोक गाउँपालिका वडा नं. ६ मा नेपाली कम्युनिष्ट पार्टी (नेकपा) प्रतिनिधिसभा निर्वाचन क्षेत्र नं. १ अन्तर्गत निर्वाचन परिचालन कमिटी गठन गरिएको छ। साथै, सम्पर्क कार्यालय र वडा कमिटी कार्यालयको संयुक्त रूपमा उद्घाटन गरिएको छ।
उक्त कार्यक्रम प्रतिनिधिसभा निर्वाचन क्षेत्र नं. १ का प्रत्यक्ष उम्मेदवार दिननाथ गौतमको प्रमुख आतिथ्यतामा सम्पन्न भएको हो।
कार्यक्रमलाई सम्बोधन गर्दै उम्मेदवार गौतमले मुलुक कठिन राजनीतिक अवस्थाबाट गुज्रिरहेको उल्लेख गरे। उनले विभिन्न कारणले समयमै निर्वाचन हुन नसकेको अवस्था भए पनि अहिले जनताको मतबाट परिवर्तन सम्भव हुने बताए। भ्रष्टाचार, बेथिति र अन्यायविरुद्ध जनतामा बढ्दो असन्तोषलाई परिवर्तनको आधारका रूपमा लिनुपर्ने उनको भनाइ थियो।
गौतमले जेन्जी (Gen-Z) आन्दोलनले उठाएका विषयहरू जनताको वास्तविक चाहना भएको उल्लेख गर्दै ती मुद्दाहरू नेपाली कम्युनिष्ट पार्टीले पहिलेदेखि नै उठाउँदै आएको दाबी गरे।
उनले समानुपातिक, समावेशी प्रतिनिधित्व, आदिवासी जनजाति, दलित, पिछडिएका वर्ग तथा मधेसी समुदायका अधिकार नेकपाका प्रमुख एजेन्डा भएको बताए।
“बेथानचोक–६ का जनताले अत्यधिक मत दिएर नेकपालाई विजयी गराउने विश्वास लिएको छु,” उनले भने।
गौतमले जनताका समस्या नै आफ्ना समस्या भएको उल्लेख गर्दै नेकपा जनताबाट जन्मिएको र जनताकै पक्षमा उभिने पार्टी भएको बताए। स्थानीय आवश्यकताको पहिचान गरी प्राथमिकताका आधारमा समस्या समाधान गर्ने तथा विगतमा अधुरा रहेका कामहरू पूरा गर्ने प्रतिबद्धता पनि उनले व्यक्त गरे।
कार्यक्रममा समानुपातिक उम्मेदवार मिना पाख्रीन, बागमती प्रदेश सचिवालय सदस्य तथा युवा नेता दैबलाल घिसिङ (अनुसिल), पालिका कमिटी अध्यक्ष तारा राणा (तिमल्सिना) लगायतले सम्बोधन गर्दै यसपटक नेपाली कम्युनिष्ट पार्टी देशव्यापी रूपमा बलियो शक्ति बन्ने दाबी गरे। उनीहरूले आम मतदातालाई तारा चिन्हमा मतदान गर्न आग्रह गरे।
नेताहरूले पार्टी एकतामार्फत अघि बढ्नुपर्नेमा जोड दिँदै नेपाली कम्युनिष्ट पार्टी सधैं जनताको पक्षमा संघर्षरत रहेको बताए।
उमेश लामाको अध्यक्षतामा बेथानचोकको भुग्देउमा सम्पन्न कार्यक्रममा प्रदेश, जिल्ला, पालिका तथा वडा तहका नेता तथा कार्यकर्ताहरूको उल्लेख्य उपस्थिति रहेको थियो।
