धुलिखेल — असोज १८ गतेदेखि परेको अविरल वर्षाका कारण धुलिखेल नगर क्षेत्रका विभिन्न स्थानमा जनधन र भौतिक पूर्वाधारमा क्षति पुगेपछि धुलिखेल नगरपालिकाले आकस्मिक बैठक बसेर राहत तथा उद्धारका महत्वपूर्ण निर्णय गरेको छ।
आज मिति २०८२ साल आश्विन १९ गते, आइतबार बसेको नगरपालिकाको पूर्ण बैठकमा नगर प्रमुख, उप–प्रमुख, १२ वटै वडाका वडा अध्यक्षहरू र सम्बन्धित शाखाका प्रमुखहरूको सहभागिता थियो। बैठकले अविरल वर्षाबाट प्रभावित नागरिकहरूलाई तत्काल राहत प्रदान गर्न आवश्यक योजना तय गरेको हो।
बैठकले पूर्ण रूपमा क्षति भएका निजी आवासहरूको स्थलगत प्राविधिक निरीक्षण गरी राहत उपलब्ध गराउने, त्यस्ता परिवारलाई खाद्यान्न, त्रिपाल र जस्ता पाता जस्ता आवश्यक सामग्री वितरण गर्ने निर्णय गरेको छ। आंशिक क्षति भएका आवासहरूमा थप जोखिम बढ्न नदिन त्रिपाल र प्लास्टिक उपलब्ध गराइनेछ।
पूर्ण रूपमा क्षति भएका घरलाई ५० हजार, आंशिक क्षति भएका घरलाई २० हजार र गोठहरूलाई १० हजार रुपैयाँ राहतस्वरूप उपलब्ध गराइने नगरपालिकाले जनाएको छ। साथै, सबै वडाका मुख्य सडकहरू तत्काल सुचारु गर्न र सहायक सडकहरू क्रमशः खुलाउँदै लैजान सम्बन्धित निकायहरूलाई निर्देशन दिइएको छ।
खानेपानीका मुहान र पाइपलाइनहरू तत्काल मर्मत गरी सञ्चालनमा ल्याउने, वर्षातपछि फैलिन सक्ने हैजा लगायतका रोगहरू नियन्त्रणका लागि नगर स्वास्थ्य संयन्त्रलाई चुस्त-दुरुस्त राखी प्रभावकारी रूपमा परिचालन गर्ने निर्णय पनि गरिएको छ।
नगरपालिकाले सबै वडामा भएका क्षतिको विस्तृत विवरण संकलन कार्य तत्काल प्रारम्भ गर्ने र प्रभावित क्षेत्रका नागरिकहरूलाई राहत तथा उद्धार कार्यमा कुनै ढिलाइ हुन नदिन सम्बन्धित शाखाहरूलाई सक्रिय रूपमा परिचालन गर्न निर्देशन दिएको छ।
