झलनाथ खनाल सम्मानित नेता एकीकृत समाजवादी
कमरेड बिदुर सापकोटाको असामयिक र दुखद निधनले नेपाली कम्युनिष्ट आन्दोलन नै दुखित र स्तब्ध बनेको छ । वहाँ मात्र ५८ वर्षको जवान योद्धा हुनुहुन्थ्यो । वहाँ लिवरको समस्याले निकै अघिदेखि पीडित हुनुहुन्थ्यो । वहाँको उपचारका निम्ति धेरै कोसिस भयो । केही दिन अघि देखि वहाँ हेल्पीङ ह्यान्ड हस्पिटलमा उपचाररत हुनुहुन्थ्यो । स्वयं वहाँकी धर्मपत्नी डाक्टर भारती भेटवालले समेत अन्तिमसम्म प्रयत्न गर्नुभयो । तर कुनै प्रयत्नले पनि वहाँलाई बचाउन सम्भव भएन । आखिर यही फागुन ७ गते ०८१ मा वहाँको अत्यन्त असामयिक र दुखद निधन भएको छ । यस दुखद घडीमा म वहाँप्रति हार्दिक श्रद्धाञ्जली अर्पण गर्दछु र वहाँको धर्मपत्नी डाक्टर भारती भेटवाल, छोरी विभु सापकोटा र वहाँका शोक सन्तब्ध परिवारजनप्रति गहिरो समवेदना प्रकट गर्दछु ।
कमरेड बिदुर सापकोटा नेपालको कम्युनिष्ट आन्दोलनका एक प्रखर नेता तथा योद्धा हुनुहुन्थ्यो । वहाँले नेपालमा जनवादी क्रान्ति सम्पन्न गर्नका निम्ति, देशभक्तिपूर्ण आन्दोलनलाई अघि बढाउनका निम्ति, गणतन्त्र नेपालको स्थापनाका निम्ति, संविधान निर्माणका निम्ति, वैज्ञानिक समाजवादका निम्ति, समाजवादी क्रान्ति र रूपान्तरणको प्रक्रियालाई अघि बढाउनका निम्ति र हाम्रो पार्टी नेकपा (एकीकृत समाजवादी) लाई विकास र विस्तारका निम्ति पार्टीको पोलिटब्युरोको हैसियतमा समेत रहेर महत्वपूर्ण योगदान गर्नुभएको छ । वहाँको निधनबाट हाम्रो पार्टी र आन्दोलनले एउटा जुझारु, योग्य,नीतिनिष्ठ र कर्मनिष्ठ नेतालाई गुमाएको छ ।
वहाँ २०३६ सालदेखि नै विद्यार्थी आन्दोलन मार्फत मुलुकको जनवादी आन्दोलन र कम्युनिष्ट आन्दोलनमा सरिक हुनुभएको थियो । २०४१ सालसम्म वहाँले अनेरास्ववियुका रहेर विद्यार्थी आन्दोलनको नेतृत्व गर्नुभएको थियो । २०४३ सालदेखि काभ्रे जिल्ला पार्टी कमिटीमा रहेर तथा २०५१–२०६४ सम्म जिल्ला कमिटीको सचिवमा रहेर वहाँले कम्युनिष्ट आन्दोलनको विकास र विस्तारका निम्ति महत्वपूर्ण योगदान गर्नुभयो । त्यसबाट अघि बढेर बागमती प्रदेश कमिटीको उपाध्यक्ष, केन्द्रीय कमिटीको सदस्य र हाल केन्द्रीय कमिटी पोलिटब्युरोको सदस्य भएर वहाँले पार्टी र समाजवादी क्रान्तिकारी आन्दोलनलाई अघि बढाउन सक्रिय भूमिका निर्वाह गरिरहनुभएको थियो । वहाँले पार्टी, क्रान्ति, देश र जनताका निम्ति अझै धेरै योगदान गर्ने सम्भावनाहरु थिए । तर ती सबै सम्भावनाहरू अधुरै छोडेर वहाँ दिवंगत हुनुभएको छ ।
अब हामीहरूसँग वहाँको पार्थिव शरीर छैन । तर वहाँले दिनुभएका वैचारिक, राजनीतिक संगठनात्मक र अन्य योगदानहरू हामीसँग छन् । वहाँले छोडेर जानुभएका क्रान्तिकारी गुणहरू, असल शैलीहरू र सद्गुणहरू सबै हामीसँग र हाम्रो पार्टी सँगै छन् । हामीले ती महत्वपूर्ण कुराहरूको संरक्षण गर्नुपर्छ, तिनीहरुबाट अभिप्रेरणा लिनुपर्छ र तिनीहरूबाट सिकीरहनुपर्छ । एउटा शक्तिशाली कम्युनिष्ट पार्टी निर्माण गर्ने, सम्पूर्ण क्रान्तिकारी कम्युनिष्टहरुलाई एकताबद्ध पार्ने, समाजवादी क्रान्तिलाई जोडदार रुपले अघि बढाउने र नेपाली विशेषता सहितको समृद्ध समाजवादी नेपाल निर्माण गर्ने वहाँको सुन्दर सपना थियो । त्यो सपना अधुरै रहेको छ । हामी सबै त्यो सपना पूरा गर्न एकजुट भएर अघि बढौँ । यसरी मात्र वहाँका सपनाहरू पूरा गर्न सकिन्छ ।
अन्त्यमा, म कमरेड बिदुर सापकोटाप्रति अन्तिम श्रद्धाञ्जली अर्पण गर्दछु ।
कमरेड बिदुर सापकोटा बिदा !
अलविदा!!!
९ फागुन, २०८१
