काठमाडौं। राष्ट्रिका साहित्य प्रतिष्ठानको साधारण सभाले ऋषभ देव घिमिरेको अध्यक्षतामा नयाँ कार्यसमिति चयन गरेको छ।
विहीबार राजधानीमा सम्पन्न साधारण सभाले उपाध्यक्षमा डा. शान्तिमाया गिरी, महासचिवमा मधु पाठक, सचिवमा सुमन घिमिरे, कोषाध्यक्षमा हरिवोल ढकाल चयन गरेको हो। त्यसैगरी कार्यसमिति सदस्यमा सुष्मा आचार्य, छविरमण सिलवाल, डा. सृजना शर्मा र प्रदीप सापकोटा निर्वाचित भएका छन्।
सभाको अवसरमा संस्कृति संवाद कार्यक्रम पनि आयोजना गरिएको थियो। प्रमुख अतिथि प्रा. पुरुषोत्तम दाहालले साहित्यलाई संस्कृतिसँग जोड्नु आजको आवश्यकता भएको बताए। उनले असार १५ को सांस्कृतिक सन्दर्भ जोडेर यस्तो कार्यक्रम आयोजना गरेकोमा राष्ट्रिकालाई धन्यवाद दिए।
वरिष्ठ साहित्यकार तथा नेपाल स्रष्टा समाजका अध्यक्ष श्रीओम श्रेष्ठ ‘रोदन’ले संस्कृतिको संरक्षण र जगेर्ना अत्यावश्यक भएको उल्लेख गर्दै नयाँ पुस्तालाई साहित्यतर्फ आकर्षित गर्नु आजको चुनौती भएको धारणा राखे।
कार्यक्रममा वरिष्ठ साहित्यकार पवन आलोक, प्रा.डा. जीवन अधिकारी, चिनिमाया माझी लगायतले शुभकामना मन्तव्य दिएका थिए। मधु पाठकले सञ्चालन गरेको कार्यक्रमको अध्यक्षता ऋषभ देव घिमिरेले गरेका थिए। साधारण सभाले आर्थिक तथा प्रगति प्रतिवेदन पनि पारित गरेको थियो।
