बनेपा/'सम्पुर्ण महिलाहरुका लागि अधिकार, समानता र शसक्तिकरण' मुल नाराका साथ अखिल नेपाल महिला संघ (क्रान्तिकारी) जिल्ला समन्वय समिति काभ्रेेले ११५ औ नारी दिवस मनाएको छ।
कार्यक्रममा प्रमुख अतिथि अखिल नेपाल महिला संघ (क्रान्तिकारी)का केन्द्रीय अध्यक्ष अमृता थापाले आज समानुपातिक, समावेशीको दुहाई दिएर अस्थिर सरकारको नाम दिएर भ्रम छर्न खोजिरहेकोमा खबरदारी गरिन् । केन्द्रिय अध्यक्ष थापाले अन्तर्राष्ट्रिय महिला दिवसलाई उत्सवका रुपमा लिएको बताएकी छिन् । ११५ औँ अन्तर्राष्ट्रिय श्रमिक महिला दिवसको अवसरमा शनिबार बनेपामा आयोजित सभालाई सम्बोधन गर्दै उनले यस्तो बताएकी हुन् । दश वर्षे महान जनयुद्धले चुलो चौकोमा सिमित महिलाहरुलाई देशको राष्ट्रपतिदेखि सभामुखसम्म बनाएको बताउदै उनले ११५ औँ अन्तर्राष्ट्रिय श्रमिक महिला दिवस मनाई रहँदा पनि महिलाहरु सुरक्षित हुन नसकेको बताइन् । घरको काममा सिमित महिलाहरुलाई आवाज बुलन्द गर्ने साहस र अठोट्का साथ जनयद्ध सुरु भएको बताउदै उनले भएका परिवर्तनहरुलाई पनि उल्ट्याउने काम हुँदै आएको बताइन् । महिलाहरुले आफ्नो अधिकारको लागि बोल्दै गर्दा असुरक्षित हुनु परेको बताउँदै उनले दाइजोको नाममा, छाउपडीकाे नाममा महिलाहरुले मर्नु परेको बताइन् । यस्ता थुप्रै समस्याहरुले विकराल रुप लिएको बताउदै उनले यसका विरुद्ध आवाज उठाउन जरुरी भएको बताइन् ।
अखिल नेपाल महिला संघ क्रान्तिकारीले आवाज उठाउदै आएको बताउँदै उनले सङ्घर्ष र उपलब्धिलाई आत्मसाथ गर्दै दिवस मनाइरहेको बताइन् । श्रमिक महिलाहरु दलाल पुँजिपति राज्यसत्ताको विरुद्धमा एक ठाउँमा आउन जरुरी भएको बताउँदै उनले समानताको लागि माओवादी केन्द्रको झन्डामुनी गोलबन्द हुन जरुरी भएको बताइन् ।
त्यसैगरी नेपाल कम्युनिष्ट पार्टीका केन्द्रिय सदस्य तथा संघीय सांसद सुर्यमान दोङले ११५ औँ अन्तर्राष्ट्रिय महिला दिवस मनाई रहँदा पनि महिलाहरु पीडित हुने गरेको बताए । दलाल पुजिवादी राज्यसत्ताले महिलाहरुलाई पिडामा राखेको बताउँदै उनले यसको निकास वैज्ञानिक समाजवाद भएको बताए । नेपाली विशेषताको समाजवादका लागि सबैले एकजुट हुन जरुरी भएको उनले बताए । त्यसैगरी नेपाल कम्युनिष्ट पार्टीका केन्द्रिय सदस्य तथा बागमती प्रदेश सभा सदस्य रुकु चौलागाईले महिलामाथी हुने शोषण दमनका विरुद्ध निरन्तर आवाज उठाइ रहेको बताउदै उनले महिलाहरुले मुक्तिका लागि बलिदान गरेका भएपनि अझै महिलाहरुले हिंसा भोगिरहेको बताइन् । पितृसत्तासङ्गै दलाल पुँजिवादी सत्तासँग लडनुपर्ने बाध्यता रहेको उनले बताइन् । महिलाहरुले त्याग तपस्या बलिदान गरेर पनि अधिकार नपाएको बताउँदै उनले महिलाहरुलाई अधिकार सम्पन्न बनाउन नेकपा माओवादी केन्द्र लडिरहेको बताइन् । सबै महिलाहरु एक ठाउँमा आएर मात्र मुक्ति सम्भव भएको बताइन् ।
चौरी देउराली गाउँपालिका प्रमुख रेणुका चौलागाईंले समाजवादमा मात्रै महिलाको मुक्ति सम्भव हुने ठोकुवा गरेकी छन् । “सडकमा मकै पोल्ने महिला, चटपटे बेच्ने महिला र साग बेच्ने महिलाको जीवनको प्रत्याभूति यो राज्यले कतिबेला दिन्छ ? उनले प्रश्न गरिन् ।
अखिल नेपाल महिला संघ(क्रान्तिकारी) जिल्ला समन्वय समिति काभ्रेेका संयोजक मनिता लामाको अध्यक्षता र उपसंयोजक मेनुका चौलागाईं स्वागत मन्तव्य रहेको कार्यक्रमको राममाया तामाङले गर्नुभएको थियो। कार्यक्रम शुरु हुनुअघि साँस्कृतिक झाँकी सहित जुलुसले नगरपरिक्रमा गरेका थिए। कार्यक्रमको बीचमा गीत तथा नृत्य प्रस्तुत गरिएको थियो।
