काठमाडौं । नेकपा (एमाले) काभ्रेका केही नेता तथा कार्यकर्ताहरु आज नेकपा (एकीकृत समाजवादी)मा प्रवेश गरेका छन् । नेकपा एकीकृत समाजवादीको केन्द्रीय कार्यालय मिनभवन, आलोकनगरमा आयोजित एक कार्यक्रमकाबीच उनीहरु पार्टी प्रवेश गरेका हुन् ।
एकीकृत समाजवादीका अनुसार काभ्रेको मण्डन देउपुर वडा नम्बर – १ का एमाले वडासचिवसहित ५० जनाले एमाले परित्याग गरे हुन्। जुन एमाले नेता गोकुल बास्कोटाको वडा पर्दछ । नवप्रवेशीहरुलाई नेकपा (एकीकृत समासजवादीं)का अध्यक्ष माधवकुमार नेपालले स्वागत गरेका थिए ।
नेकपा (एकीकृत समाजवादी)का अध्यक्ष नेपालले राष्ट्रियसभाको चुनावको परिणामले अन्य चुनावमा पनि तरंग पैदा गर्ने बताए । संविधानलाई सर्वोपरी राखेर कानूनअनुसार नै चुनाव हुनुपर्छ भन्ने आफूहरूको भनाई रहेको बताउँदै उनले सबै चुनाव एकैपटक गर्नसक्दा राम्रो हुनेमा जोड दिए ।
‘एउटा चुनाव गराउन ५ अर्ब खर्च हुन्छ,’ नेपालको भनाइ छ, ‘तीनवटा चुनाव गराउन २० अर्ब खर्च हुन्छ । एकैपटक गर्दा यो खर्च जोगिन्छ । उम्मेदवारको पनि पैसा जोगिन्छ ।’
