बनेपा/१८६१ डुल सोनाम ल्होछारको अवसरमा बनेपामा मेला तथा महोत्सव हुने भएको छ ।
औद्योगिक मेला महोत्सव प्रतिष्ठान नेपालको आयोजनामा बनेपा नगरपालिकाको उग्रेश्वर मन्दिरको खाली जग्गामा यही माघ १६ देखि २२ गतेसम्म औद्योगिक मेला तथा महोत्सव सञ्चालन गर्न लागिएको हो ।
सोनाम ल्होछारको अवसरमा महोत्सव सञ्चालन हुने मेला तथा महोत्सवका संयोजक क्षेत्रबहादुर वाईबाले जानकारी दिनुभयो ।
महोत्सवमा लघु उद्यम प्रर्दशनी, अटो प्रर्दशनी, कृषि प्रर्दशनी, गार्मेन्टका उत्पादन, जुत्ता चप्पल, वैकल्पिक उर्जा, पर्यटन प्रवर्द्धन, गुणस्तरिय दैनिक उपभोग्य सामग्री, निर्माण सामग्री तथा औजार, सूचना प्रविधि तथा विद्युतिय सामाग्री, शिक्षा तथा स्वास्थ्य क्षेत्रका सेवाहरु, सास्कृतिक कार्यक्रम, हास्यव्यङ्ग, स्थानीय पहिचान झल्काउने झाँकी तथा जातविशेषको नाच, पर्यटन क्षेत्रको विस्तृत जानकारी, स्थानीय खानाका विशेष परिकारहरु, बाल उद्यानहरु मेलाका मुख्य आकर्षण रहने पत्रकार सम्मेलनमा जानकारी दिए ।
मेलामा तामाङ समुदायका रहनसहन, भेषभुषा र खानामा परिकार तथा नृत्य पनि प्रस्तुत हुनेछ। काभ्रेपलाञ्चोक जिल्लाको डाँडापारि क्षेत्रमा उत्पादित कृषिजन्य सामग्रीहरूको प्रवर्द्धन गर्नुका साथै झण्डै २ लाख जनाले अवलोकन गर्ने आयोजकको दावी छ ।
तामाङ जातिको बाक्लो बसोबास रहेको यस जिल्लामा सांस्कृतिक रूपमा संरक्षण, प्रचारप्रसार गर्ने र सुस्त रहेको अर्थतन्त्रलाई चलायमान बनाउने हेतुले मेला तथा महोत्सव गर्न लागिएको संयोजक वाईबाले बताउनुभयो । कृषि क्षेत्रको प्रवर्द्धन तथा आधुनिक कृषि तर्फ किसानहरुलाई उजागर गराई स्थानिय स्तरमा तथा स्वदेशमै उत्पादित वस्तु र सेवाको विकास तथा बजार विस्तार गर्न, सम्पूर्ण धार्मिक तथा पर्यटकिय क्षेत्रहरुको प्रचार-प्रसार तथा प्रवर्द्धन गर्न, घरेलु, साना तथा मझौला उद्योगहरुले उत्पादन गरेका वस्तुको वजार प्रवर्द्धनमा टेवा पुग्ने बताईएको छ ।
ग्रामिण क्षेत्रमा उत्पादन हुने हस्तकलाका सामग्रीहरु, सीप मुलक तालिम र तालिमवाट उत्पादन वस्तुको प्रवर्द्धन गर्ने मेलाका मुख्य उद्देश्य रहेको संयोजक वाईबाले बताउनुभयो ।
७ दिनसम्म सञ्चालन हुने मेलामा ६० भन्दा बढी स्टलहरु रहने छन् । जिल्ला प्रशासन कार्यालय, जिल्ला प्रहरी कार्यालय, बनेपा नगरपालिका, ईलाका प्रहरी कार्यालय बनेपालगायत निकायसँग सहकार्य गरिएको छ ।
