धुलिखेल/नेपाल आदिवासी जनजाति पत्रकार महासंघ( फोनिज) काभ्रेको आयोजनामा काभ्रेको धुलिखेलमा सञ्चालित ४ दिने मोजो तालिम संपन्न भएको छ । रोशी गाउँपालिकाको आर्थिक सहयोगमा काभ्रे फोनिजको आयोजनामा मोबाइल पत्रकारिता (डिजिटल मिडिया) सहयोगमा जेठ १४ गतेदेखि सुरु भएको तालिम आज सकिएको हो ।
तालिमको समापन कार्यक्रमका प्रमुख अतिथि रोशी गाउँपालिकाका अध्यक्ष दिनेश लामाले पत्रकारितामा नयाँ नयाँ प्रविधिको सहज प्रयोगका लागि तालिम महत्वपुर्ण हुने विश्वास व्यक्त गरेका छन् । पत्रकारितालाई गुणस्तरीय बनाउन पत्रकार आफैंले मिहिनेत गनुपर्ने बताउँदै प्रमुख अतिथि लामाले पत्रकारिताको माध्यमले पहिचान र जनजातिको अधिकारका बारे सशक्त रुपमा समाचार प्रकाशन गर्न आग्रह गर्नुभयो।
फोनिजका संघिय अध्यक्ष गजुरधन राईले अहिले सञ्चारको क्षेत्रमा मोबाइल पत्रकारिताको महत्व बढ्दै गएकोले यो तालिमबाट सिकेकाे सिपलाई सही सदुपयोग गर्दै पत्रकारितालाई अगाडि बढाउन आवश्यक रहेको बताउनुभयो । पछिल्लो समयमा प्रविधिको दुरुपयोग भइरहेको बताउनुहुँदै उहाँले यसप्रति सञ्चारकर्मी सचेत हुनुपर्ने समेत बताउनुभयो ।
समापन कार्यक्रममा रोशी गाउँपालिकाका उपाध्यक्ष मिमबहादुर वाइवा, वागमति प्रदेश इन्चार्ज पेमा लामा, प्रदेश अध्यक्ष युवराज श्रेष्ठ, नेपाल पत्रकार महासंघ काभ्रेका अध्यक्ष बद्री तिमल्सिना, निवर्तमान अध्यक्ष मोतिराम तिमल्सिना लगायत विभिन्न संघसंगठनका प्रमुखहरुको सहभागीता रहेको थियो ।
तालिममा जिल्लाका विभिन्न क्षेत्रका २० जनाको सहभागीता रहेको थियो । तालिमले अनलाईन, भिडियो तथा फोटो पत्रकारीतालाई सहज बनाउन सहयोग पुर्याउने सहभागीले बताएका छन । कार्यक्रममा फोनिज जिल्ला अध्यक्ष इन्द्रबहादुर थापाको सभापतित्व रहेको थियो ।
