काठमाडौँ । मन्त्रिपरिषद् बैठकले निर्णय गरेअनुरूप जनयुद्ध र जनआन्दोलनका क्रममा सहादत प्राप्त गर्ने सहिदहरूको नामावली नेपाल राजपत्रमा प्रकाशित भएको छ ।
गत फागुन १५ गते प्रधानमन्त्री पुष्पकमल दाहाल ‘प्रचण्ड’को अध्यक्षतामा बसेको मन्त्रिपरिषद् बैठकले जनयुद्धदेखि विस्तृत शान्ति सम्झौताको अवधिसम्म सहिद भएकाको नामावली राजपत्रमा प्रकाशित गरी राष्ट्रिय सहिदको मान्यता दिने निर्णय गरेको थियो ।
मन्त्रिपरिषद्को निर्णयपछि गृह मन्त्रालयले ७७ वटै जिल्ला प्रशासन कार्यालयमा पत्र पठाई सहिदहरूको अभिलेख माग गरेको थियो । ७७ जिल्लाबाट प्राप्त सोही अभिलेखका आधारमा सहिदहरूको नामावली राजपत्रमा प्रकाशित भएको प्रधानमन्त्री दाहालका प्रेस विज्ञ मनहरि तिमिल्सिनाले जानकारी दिए ।
यसैक्रममा काभ्रेबाट जिल्ला प्रशासन कार्यालय काभ्रे पठाएका शहिदहरुको नामावली मध्ये १३५ जनाको मात्र नाम प्रकाशन भएको छ । गृहमन्त्रालयको अभिलेखमा रहेका १४५ जनामध्ये दोहोरो नाम हटाउँदा १३५ मात्र रहन पुुगेको थियो । तर नेपाल सरकारबाट परिवारले राहत समेत बुझि लिएका विवरणमा छुटेका १ सय ५२ जना शहिदहरुको नाम थप गरी पठाइएकोमा उक्त सूची भने राजपत्रमा प्रकाशन भएको छैन । प्रधानमन्त्री कार्यालयका अनुसार उक्त नामहरु पनि अर्को सुचीमा प्रकाशन गर्ने तयारीमा रहेको बताइएको छ ।
जनयुद्धका सहिदहरूले राष्ट्रिय सहिदको मान्यता पाउनुपर्ने माग बारम्बार उठ्दै आएपनि उनीहरूले राष्ट्रिय सहिदको मान्यता पाउन सकेका थिएनन् ।
यससँगै जनयुद्धकालमा राज्य र विद्रोही पक्षबाट ज्यान गुमाएका नागरिकले राष्ट्रिय सहिदको मान्यता पाएका छन् । राष्ट्रिय सहिदका परिवारले यसअघि सहिद घोषणा भई राज्यबाट परिपूरण र सम्मानस्वरूप प्राप्त गरेको सुविधाअनुरूप नै क्षतिपूर्ति, परिपूरण र सम्मान पाउनेछन् ।
