पनौती। पूर्वप्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्डले बाढी पहिरो जान सक्ने पूर्वसूचना पाउँदासमेत सरकारले प्रभाकारी काम नगरेको बताएका छन् । बुधवार काभ्रेपलाञ्चोक जिल्लाको पनौती नगरपालिका -१२, भुमिडाँडा रोशीमा बाढी पहिरोबाट क्षति पुगेको क्षेत्रको स्थलगत अनुगमन गर्नुहुँदै उक्त कुरा बताउनुभएको हो।
अत्यधिक वर्षापछि बाढी पहिरोले क्षति पुर्याउने क्षेत्रको पूर्वसूचना पहिले नै आएको थियो । मैले पनि पूर्वतयारीका विषयमा सरकारको ध्यानाकर्षण गराएको थिएँ । तर सरकारले ध्यान नदिँदा धेरै जनधनको क्षति भएको छ । अब राष्ट्रिय सङ्कटको यस घडीमा सत्तापक्ष र प्रतिपक्ष मिलेर सामना गर्नुपर्छ, उनले भने ।
अत्यधिक वर्षा र बाढीका कारण सबैभन्दा बढी क्षति काभ्रेमा भएको भन्दै उनले पीडितहरूको उद्धार र राहतका लागि तत्काल पहल थाल्न उनले सरकारसँग आग्रह गरे । उहाँले क्षतिग्रस्त क्षेत्रमा विशेषगरी बत्तीको समस्यामा छिटो समाधान गर्न पहलकदमी लिने बताउनुभयो।
पनौती -१२ का वडाध्यक्ष जयराम केसीले बाढी पहिरोबाट पुगेको क्षति, समस्या र जनअपेक्षाको साथै राहत र पुनर्निर्माणको बारेमा पुर्व प्रधानमन्त्री तथा प्रतिपक्षी नेता पुष्पकमल दाहालसँग कुरा राखेका थिए।
साथै यस अघि जिल्ला प्रशासन कार्यालय काभ्रेको तर्फबाट जिल्लामा भएको उद्दारको गतिविधि र राहतको बारे जानकारी लिएका थिए। पीडितहरूको उद्धार र राहतका लागि सुरक्षा निकाय, जिल्ला प्रशासन कार्यालय र जनप्रतिनिधिले खेलेको भूमिकाको पुर्व प्रधानमन्त्री दाहालले खुलेर प्रशंसा गरे ।
०७२ सालको महाभूकम्पमा सत्तापक्ष र प्रतिपक्ष दुवै मिलेर राष्ट्रिय विपत्तिको सामना गरेको स्मरण गर्दै अहिले पनि सबै मिलेर राष्ट्रिय सङ्कटको सामना गरेर जानुपर्नेमा उहाँले जोड दिए । बेपत्ता खोजी कार्य पनि अझै बाँकी रहेको र खोज उद्धार, राहत तथा पुनर्स्थापनाका लागि तत्कालीन र दीर्घकालीन योजना बनाउनुपर्ने प्रचण्डले बताए ।
दसैँ तिहार आएकाले सबैभन्दा पहिला सडक सञ्चालन गर्न सरकारसँग माग गरे । कार्यक्रममा सहभागीहरूले काभ्रेमा मुख्य समस्या बाटो, बिजुली, खानेपानी र खाद्यान्न आपूर्ति रहेको प्रचण्डलाई जानकारी गराएका थिए ।
कार्यक्रममा संघीय सांसद सुर्यमान दोङ र मिना तामाङ, प्रदेश सांसदद्वय रत्न ढकाल र रुकु चौलागाईं लगायत जिल्लाका नेता कार्यकर्ताहरुको सहभागीता रहेको थियो। पुर्व प्रधानमन्त्री दाहालले धुलिखेल अस्पतालमा रहेका बिरामीहरुको स्वास्थ्यको बारेमा जानकारी लिनुका साथै स्वास्थ्य लाभको कामना गरेका थिए।
