बनेपा /पताञ्जलि योग समिति काभ्रे, महिला पतञ्जली योग समिति र युवा नेपाल काभ्रेको संयुक्त आयोजना र बनेपा नगर समितिको संयोजनमा आइतबारदेखि बनेपाको लायकुमा बृहत् योग शिविरको आयोजना गरेको छ ।
बनेपा नगर प्रमुख शान्तिरत्न शाक्यले शिविरको उद्घाटन गर्नुहुँदै योग मानव जीवनका लागि अपरिहार्य भएको बताउनुभयो । मानिसको शारीरिक एवं मानसिक तनावमुक्त गर्न योग अति आवश्यक रहेकाले यो दैनिक रुपमा गर्नुपर्नेमा उनले जोड दिनुभयो ।
‘गरौँ योग, रहौँ निरोग’ भन्ने मूल नाराका आयोजित पाँच दिने सो शिविरमा करीब पाँच सय जनाको सहभागिता रहेको पतञ्जली योग समिति बनेपा नगरका संयोजक मनिषा बडालले जानकारी दिनुभयो।
मानिसहरुमा योग जागरण ल्याउने र मानसिक तथा शारीरिक तनावलाई छुट्कारा दिलाउनका लागि योग शिविर आयोजना गरिएको पतञ्जली योग समिति काभ्रेका अध्यक्ष प्रकाश कायस्थले जानकारी दिनुभयो । उनले भने, “योगबाट कुनै मानिसको समस्या छिट्टै निको पनि भइहाल्छ, कुनैको केही समय लाग्न सक्छन् तर प्रभावकारी हुन्छ ।”
शिविरमा पतञ्जलि योग समिति नेपालको केन्द्रीय प्रभारी साध्वी देव आदितीले प्रशिक्षण प्रदान गरेका थिए । शिविर जेठ १७ गतेसम्म सञ्चालन हुने र जिल्लाका सबै योग केन्द्रबाट प्रतिनिधित्वमुलक सहभागिता रहेको महिला पतञ्जली योग समिति काभ्रेका उपाध्यक्ष कमला राजभण्डारीले जानकारी दिनुभयो।
