काठमाडौं । भ्रष्टाचार, अव्यवस्था र सामाजिक सञ्जाल बन्द गर्ने सरकारको निर्णयविरुद्ध नयाँ पुस्ताका युवा (जेन जी)हरुले प्रदर्शन थालेका छन् । माइतीघर मण्डलामा भेला भएका युवाहरुले सरकारको कदमलाई “अलोकतान्त्रिक” भन्दै प्रतिवाद गरेका हुन् ।
युवाहरुले ‘जेनजी पुस्ता चिच्याउँछ, भ्रष्टहरुलाई गिज्याउँछ’, ‘हाम्रो सञ्जाल हाम्रो आवाज’, ‘भ्रष्टाचार बन्द गर, स्वतन्त्रता बन्द नगर’ जस्ता नारा लेखिएका प्लेकार्डसहित प्रदर्शन गरेका थिए । कतिपय विद्यार्थीहरू कलेज र स्कुलको पोशाकमै प्रदर्शनमा देखिए, जसले आन्दोलनको स्वतःस्फूर्तता झल्काएको छ ।
गत केही हप्तादेखि सामाजिक सञ्जालमा युवाहरुले सरकारविरुद्ध असन्तुष्टि पोखिरहेका थिए । सरकारको सामाजिक सञ्जाल बन्द गर्ने निर्णय सार्वजनिक भएपछि फेसबुक, इन्स्टाग्राम, टिकटक र एक्स (ट्विटर) जस्ता प्लेटफर्ममार्फत स्वतन्त्र अभियान सुरु भयो ।
“सञ्जाल हाम्रो स्वर हो, हाम्रो अधिकार हो” भन्ने हैशट्याग ट्रेन्ड हुन थालेपछि राजधानीका युवाहरुले भर्चुअल विरोधलाई सडकसम्म ल्याउने निर्णय गरेका थिए । कुनै संगठन वा दलको आधिकारिक आह्वान नभए पनि, विभिन्न कलेज, विद्यालय र पेशागत क्षेत्रका युवाहरु आफैं संगठित भएर माइतीघरमा भेला भएका हुन् ।
युवाहरुको यो आन्दोलनलाई कलाकार, पत्रकार, स्वतन्त्र अभियन्ता, वकिल, आईटी क्षेत्रमा संलग्न युवा तथा केही जनप्रतिनिधिहरूले खुलेर समर्थन गरेका छन् । उनीहरुले यो आन्दोलनलाई “सकारात्मक सुरुवात” भन्दै दीर्घकालीन परिवर्तनतर्फको संकेतका रूपमा लिएका छन् ।
नेपालमा युवापुस्ताले विगतमा पनि पटक–पटक स्वतन्त्रता र पारदर्शिताको पक्षमा आवाज उठाएको पाइन्छ । तर जेन जी पुस्ताले डिजिटल स्वतन्त्रता र भ्रष्टाचारविरोधलाई एउटै मुद्दा बनाएर सडकमा आउनु नयाँ अभ्यास हो ।
यसले दुईवटा कुरा स्पष्ट गर्छ – पहिलो, नयाँ पुस्ता अब केवल भर्चुअल जगतमा सीमित छैन, उनीहरु प्रत्यक्ष सडकमा पनि सशक्त रूपमा आउन सक्छन् । दोस्रो, सरकारले युवाको आवाजलाई अवहेलना गर्न खोजे आन्दोलन अझ व्यापक हुन सक्छ ।
