बनेपा । नेकपा (माओवादी केन्द्र) खानीखोला गाउँपालिका समितिको निर्णयअनुसार सञ्चालन गरिएको ३ महिने सम्पर्क अभियान अन्तर्गत वडा नं ७ को शहरी क्षेत्रमा बसोबास गर्दै आएका सर्वसाधारणसँगको भेला बनेपामा सम्पन्न भएको छ ।
भेलामा पार्टीका बागमती प्रदेश सचिव एवं खानीखोला गाउँपालिका अध्यक्ष इन्द्र बहादुर थिङ “छिन्ताङ” प्रमुख अतिथि रहनुभएको थियो । उहाँले कार्यक्रममा बोल्दै माओवादी केन्द्रले अगाडि सारेका परिवर्तनका एजेन्डालाई जनस्तरसम्म पुर्याउन सम्पर्क अभियान प्रभावकारी हुने विश्वास व्यक्त गर्नुभयो ।
प्रमुख अतिथि थिङले जनताको सक्रिय सहभागितामै नयाँ नेपाल निर्माणको आधार रहेको भन्दै सबैलाई संगठनसँग आबद्ध भई समाज रूपान्तरणको अभियानमा सक्रिय हुन आह्वान गर्नुभयो । उहाँले खानीखोला लगायत सम्पूर्ण गाउँपालिकामा विकास, शिक्षा, स्वास्थ्य र समृद्धिका मुद्दामा पार्टीले निरन्तर संघर्ष गरिरहेको बताउनुभयो ।
सभाको अध्यक्षता बिर बहादुर घिसिङले गर्नुभयो भने स्वागत मन्तव्य देबराज सोरालीले प्रस्तुत गर्नुभएको थियो । कार्यक्रमको सञ्चालन घनश्याम मोक्तानले गर्नुभएको थियो ।
भेलामा प्रमुख इन्द्र बहादुर थिङसँगै जिल्ला संयोजक भोला अर्याल, दैबलाल घिसिङ, दल मान थोकर, मिना पाख्रिन, सुन्तली थिङ, खड्ग बहादुर जिम्बा, राजन अधिकारी र बुद्धि बहादुर स्याङ्तानले पनि सम्बोधन गर्नुभएको थियो ।
