काभ्रे (बनेपा) — बनेपा नगरपालिका–६ स्थित खत्री गाउँमा सञ्चालनमा रहेको “एक घर एक धारा” खानेपानी योजनाअन्तर्गतको डिपबोरिङ प्रणालीको लागि जडान गरिएको ट्रान्सफर्मर चोरीको प्रयास भएको छ।
घटनापछि वडा अध्यक्ष, प्रहरी, विद्युत् प्राधिकरणका प्रतिनिधि तथा स्थानीयवासीले संयुक्त रूपमा अनुगमन गरेका छन्। सोही स्थानमा यसअघि जडान गरिएको ट्रान्सफर्मर चोरी भएपछि पुनः राखिएको ट्रान्सफर्मरमा समेत चोरी प्रयास भएको बनेपा नगरपालिका -६ का वडाध्यक्ष सचितानन्द केसीले जानकारी दिनुभयो । उहाँका अनुसार राति २ बजे बत्तीको लाइन काटिएकोले सोही समयमा चोरीको प्रयास भएको बताउनुभयो।
उपभोक्ता समितिका अनुसार २०८२ साल चैत ६ गते शुक्रबार राति अज्ञात समूहले नियोजित रूपमा थ्री–फेज ट्रान्सफर्मर चोरीको प्रयास गरेको देखिन्छ । जसले खानेपानी वितरणमा समस्या आएको छ।
यसअघि पनि सोही स्थानमा २०८१ साल श्रावण ४ गते १०० केभिएको ट्रान्सफर्मर चोरी भएको थियो। उक्त घटनामा ट्रान्सफर्मरभित्र रहेको करिब १५० केजी तामा समेत चोरी गरिएको थियो। त्यसबेला करिब १३ लाख रुपैयाँ बराबरको क्षति भएको वडा नं. ६ का वडाध्यक्ष सचितानन्द केसीले बताएका थिए।
त्यतिबेला ट्रान्सफर्मरमा विद्युत् प्रवाह भइरहेकै अवस्थामा चोरी गरिएको र अत्याधुनिक उपकरण प्रयोग गरिएको हुन सक्ने अनुमान गरिएको थियो।
पटक–पटक दोहोरिएका यस्ता घटनाले यस क्षेत्रमा संगठित रूपमा उपकरण चोरी भइरहेको आशंका बढाएको छ। घटनाले स्थानीय उपभोक्तामा त्रास सिर्जना गर्नुका साथै खानेपानी वितरणमा पुनः समस्या उत्पन्न भएको छ।
खत्री गाउँ डिपबोरिङ खानेपानी उपभोक्ता समितिका सचिव दिपनारायण पराजुलीले घटनाप्रति गहिरो दुःख व्यक्त गर्दै समस्या समाधान गर्न केही समय लाग्ने बताएका छन्।
करीब आधा भन्दा बढी घरधुरी लाई पानीको लाइन वितरण सकिएको र बाँकीको हकमा पनि तिव्र काम भइरहेको अवस्थामा यो नियोजित हुन सक्ने आशंका गरिएको छ। पटक–पटक भइरहेका चोरीका घटनाप्रति सम्बन्धित निकायको ध्यानाकर्षण गराइएको छ। प्रहरीले दुबै घटनाबारे अनुसन्धान अघि बढाएको जनाएको छ।
