स्वतन्त्रता र उज्यालो आँखाभरि बोकेर
कहिले भिरैभिर
चेतनाको गीत गाउँदै हिड्यौ
कहिले तिरैतिर
नदीजस्तै अबिराम बगिरह्यौ
कहिले सतिसालझैं
समरको अग्रभागमा
छाती थापेर उभिइरह्यौ
गरिब, निमुखाको निम्ति
ओहो ! हाँसीहाँसी जीवन बलिदान दियौ
तिम्रो त्यो अदम्य साहसलाई सलाम
प्रिय सहिद, तिमीलाई सलाम !
दु:खीको दु:खलाई आफ्नो दु:ख बनायौ
दु:खीको सपनालाई आफ्नो सपना सम्झियौ
दु:खीको जीवनलाई आफ्नै जीवन सम्झियौ
दु:खमा सँगसँगै रोयौ
सुखमा सँगसँगै हाँस्यौ
समानताको बाटोमा हिँड्ने तिमी एक महान् यात्री
वर्गीयताको विरुद्ध लड्ने तिमी एक महान् योद्धा
तिम्रो त्यो विचारलाई सलाम
प्रिय सहिद, तिमीलाई सलाम !
तिमीले खनेको गोरेटोहरुमा
अझै जुनकिरीजस्ता मान्छेहरु हिँडिरहेछन्
तिमीले बोलेको आवाजहरुमा
अझै बतासजस्ता आवाजहरु मिस्सिरहेछन्
तिमीले कोरेको गीतहरुमा
अझै ज्युँदो संगीतहरु भरिइरहेछन्
तिम्रो रगत र पसिनाले सिंचिएको यो भूमिमा
अझै नयाँनयाँ पालुवाहरु पलाइरहेछन्
प्रिय सहिद !
तिम्रा पैतालाका डोबहरु मेटिएका छैनन्
तिम्रा आवाजहरु सून्यतामा बिलाएका छैनन्
तिम्रा गीतहरु छातीबाट हराएका छैनन्
तिम्रो सपना अझै ज्युँदो छ
तिम्रो ज्युँदो सपनालाई सलाम
प्रिय सहिद, तिमीलाई सलाम ।
(काभ्रे)
