बनेपा । बनेपा नगरपालिकाको आयोजनामा मिति २०८२ साल माघ २३ गते कक्षा ४–५ स्तरीय चित्रकला प्रतियोगिता सम्पन्न भएको छ। प्रतियोगितामा सरकारी तथा संस्थागत गरी ३३ वटा विद्यालयको सहभागिता रहेको थियो।
प्रतियोगितामा बनेपा नगरपालिका वडा नं. १४ स्थित श्री जागृति आधारभूत विद्यालयका विद्यार्थी सञ्जीव तामाङले प्रथम स्थान हासिल गरेका छन्। त्यसैगरी ग्रेसल्यान्ड एकेडेमी बनेपा–१४ का सुवर्ण विकले दोस्रो र आर्किट इन्टरनेशनल एकेडेमी बनेपा–८ की साविता श्रेष्ठले तेस्रो स्थान प्राप्त गरेका छन्।
प्रथम, दोस्रो र तेस्रो हुने विद्यार्थीलाई क्रमशः रु. ४,०००, रु. ३,००० र रु. २,००० नगद पुरस्कार तथा प्रमाणपत्र प्रदान गरिएको थियो। यस्तै, सान्त्वना पुरस्कारस्वरूप शिक्षा सदन माध्यमिक विद्यालय बनेपा–८ का किरण थिङ, आदर्श विद्या मन्दिर बनेपा–११ की रुविना तामाङ र न्यू मोडेल एकेडेमी बनेपा–१० की रुविना तामाङलाई जनही रु. १,००० नगद तथा प्रमाणपत्र प्रदान गरिएको छ।
कार्यक्रममा बनेपा नगरपालिका शिक्षा शाखाका प्रमुख तथा उपसचिव देवराज निरौलाले विजयी विद्यार्थीहरूलाई पुरस्कार तथा प्रमाणपत्र वितरण गर्नुभएको थियो।
साथै बनेपा नगरपालिका - १४ का वडाध्यक्ष टुल्कु लामाले वडाको तर्फबाट प्रोत्साहन स्वरुप जागृति आधारभूत विद्यालयका विद्यार्थी सञ्जीव तामाङलाई २ हजार ५ सय प्रदान गर्नुभएको थियो।
