काठमाडौँ– नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले एमसीसी मुख्यालयलाई लेखेको पत्रका सम्बन्धमा प्रचण्डको निजी सचिवालयले भने बचाउ गरेको छ ।
आइतबार साँझ स्पष्टीकरण दिँदै प्रचण्डको निजी सचिवालयले भनेको छ,–‘प्रतिगमनलाई परास्त गरी भर्खरै गठबन्धन सरकार निर्माण भएको समयमा प्रधानमन्त्रीमाथि एमसीसी पारित गर्नैपर्ने दबाब भएकाले राष्ट्रिय हित तथा गठबन्धन र सरकारको रक्षाका लागि उक्त पत्र लेखिएको थियो । पत्रमा एमसीसीका लागि राष्ट्रिय सहमति आवश्यक हुने र राष्ट्रिय सहमति निर्माणका लागि सरकारलाई केही समय आवश्यक पर्ने कुरा उल्लेख गरिएको हो ।’
एकातिर एमसीसीबारे जनस्तरसम्म विरोध र दबाब रहनु र अर्कोतिर तत्कालीन नेपाल कम्युनिस्ट पार्टी (नेकपा) को कार्यदलले समेत परिमार्जनविना पारित गर्न नसकिने निचोड प्रस्तुत गरेकाले गठबन्धनभित्रै एउटै मत बनिहाल्ने अवस्था नभएकाले पनि समय माग गर्नु परेको प्रचण्डको सचिवालयको स्पष्टीकरण छ । पत्रको विषयलाई अनावश्यक रुपमा उछाल्न आवश्यक नभएको प्रचण्डको सचिवालयको भनाइ छ। ‘वस्तुगत अवस्थालाई मध्यनजर गर्दै राष्ट्रहितलाई केन्द्रमा राखेर नेतृत्वले गरेको कुटनैतिक पहललाई गलत रूपमा व्याख्या गर्नु र अनावश्यक रुपमा उछाल्नुको कुनै अर्थ छैन,’ विज्ञप्तिमा उल्लेख छ।
प्रचण्डको सचिवालयले अगाडि भनेको छ, ‘हामीले देश र जनताको हितलाई सर्वाेपरि ठानी आफ्नो पार्टीका धारणा स्पष्ट गर्दै आएका छौँ। यो परियोजना परिमार्जन बिना पारित गर्नु हुँदैन भन्नेमा हाम्रो पार्टी दृढ छ। यसबारे गरिएका नियोजित प्रचारवाजीको भ्रममा नपर्न सम्पूर्ण पार्टीपंति र न्यायप्रेमी जनसमुदायमा हामी हार्दिक अपील गर्दछौँ ।
एमसीसी अनुमोदनका लागि ४ र ५ महिना समय माग गर्दै लेखेको पत्र सार्वजनिक भएपछि प्रचण्ड चर्काे दबाबमा छन् । द्वैध चरित्र देखाएको भन्दै आलोचना समेत भएको छ ।
