तालाबन्दीपछि स्ववियू निर्वाचन अन्यौलमा, अखिल र नेविसंघको विज्ञप्ति

फागुन,२६ काभ्रे। काभ्रेमा आगामी चैत ५ गते हुने भनिएको स्वतन्त्र विद्यार्थी युनियनको निर्वाचन हुनेमा अन्योलता सिर्जना भएको छ । आज काभ्रेका केही क्याम्पसहरुमा एमाले निकट भातृसंगठन अनेरास्ववियुले तालाबन्दी गरेपछि निर्वाचन हुने सम्भावना न्युन भएको हो । आज नेकपा एकीकृत समाजवादी निकट अखिल नेपाल राष्ट्रिय स्वतन्त्र विद्यार्थी यूनियन र नेपाल विद्यार्थी संघले संयुक्तरुपमा विज्ञप्ति जारी गर्दै हाललाइ स्ववियु निर्वाचन रद्द गर्न माग गरिएको छ । विज्ञप्तमा भनिएको छ "अन्य संगठनहरुको द्वैध चरित्र तथा क्रियाकलापले स्ववियु निर्वाचनको माहोल बिगार्ने, अपवित्र गतिविधि गर्ने तथा तालाबन्दी र पठन–पाठन एवं क्याम्पसहरुको सन्तुलित प्रतिष्पर्धाको वातावरण बिगार्ने काम भइरहेको छ । यसमा हाम्रो संगठनको गम्भीर ध्यानाकर्षण भएको छ । जसकारण यथास्थितिमा काभ्रे जिल्लामा निष्पक्ष स्ववियु निर्वाचन हुन नसक्ने निष्कर्षमा हामी पुगेका छौं । त्यसकारण सर्वदलीय बैठक बोलाई गैह्र विद्यार्थीको छानवीन गरी तत्पश्चात मात्रै स्ववियू निर्वाचन सुनिश्चित गर्ने माग सहित हाललाई सबै क्याम्पसको निर्वाचन कार्यालयमा तालाबन्दी गर्ने निर्णयमा पुगेका छौं ।" अनेरास्ववियू काभ्रेका अध्यक्ष रामेश्वर आचार्य र नेपाल विद्यार्थी संघ काभ्रेका सभापति अन्जन राज खतिवडाद्वारा हस्ताक्षरित विज्ञप्तिमा काभ्रे जिल्लाका सम्पूर्ण क्याम्पसहरुमा प्राकृतिक, न्यायिक तथा स्वच्छ स्ववियु निर्वाचनको माग गरी हाललाई निर्धारित सम्पूर्ण कार्यक्रम रद्द गर्न अपील समेत गरिएको छ ।