काठमाडौं । प्रतिनिधिसभा निर्वाचनको समानुपातिकतर्फको मतगणना सकिँदा राष्ट्रिय स्वतन्त्र पार्टी (रास्वपा) दुई तिहाइ बहुमतबाट दुई सिटले पछि परेको देखिएको छ।
प्रत्यक्षतर्फ १२५ सिट जितेको रास्वपाले समानुपातिक मतका आधारमा करिब ५७ सिट पाउने अनुमान गरिएको छ। निर्वाचन आयोगले प्रयोग गर्ने ‘सेन्ट–लग’ (Sainte-Laguë) सूत्रअनुसार सिट बाँडफाँट गर्दा रास्वपाको प्रतिनिधिसभामा कुल १८२ सिट पुग्ने देखिन्छ।
२७५ सदस्यीय प्रतिनिधिसभामा दुई तिहाइ बहुमतका लागि १८४ सिट आवश्यक पर्छ। यस हिसाबले रास्वपा दुई सिटले कम पर्ने देखिएको हो। स्वतन्त्र सांसद महावीर पुन भने रास्वपाको समर्थनमा निर्वाचित भएका छन्।
समानुपातिकतर्फ कुल १ करोड ७ लाख ६४ हजार ८ सय ८९ मतमध्ये रास्वपाले ५१ लाख ४६ हजार ६ सय ८१ मत प्राप्त गरेको छ, जुन करिब ४७ प्रतिशतभन्दा बढी हो।
समानुपातिक प्रणालीबाट यसपटक ६ वटा दलले प्रतिनिधित्व पाउने देखिएको छ।
नेपाली कांग्रेसले समानुपातिकमा करिब २० सिट पाउने अनुमान छ। कांग्रेसले प्रत्यक्षतर्फ १८ सिट जितेको छ। समानुपातिकमा कांग्रेसले १७ लाख ५४ हजार ५२ मत प्राप्त गरेको छ। यसरी प्रत्यक्ष र समानुपातिक गरी प्रतिनिधिसभामा कांग्रेसको कुल सिट संख्या ३८ पुग्ने देखिन्छ। अघिल्लो प्रतिनिधिसभामा कांग्रेससँग ८९ सिट थियो।
नेकपा (एमाले) ले समानुपातिकबाट करिब १६ सिट पाउने देखिएको छ भने प्रत्यक्षमा ९ सिट जितेको छ। यसरी प्रतिनिधिसभामा एमालेको कुल सिट संख्या २५ पुग्ने अनुमान गरिएको छ। अघिल्लो प्रतिनिधिसभामा एमालेसँग ७९ सिट थियो।
नेपाल कम्युनिस्ट पार्टीले समानुपातिकमा करिब ९ सिट पाउने देखिएको छ। प्रत्यक्षमा ८ सिट जितेको उक्त दलको प्रतिनिधिसभामा कुल १६ सिट हुने अनुमान गरिएको छ। समानुपातिकतर्फ उसले ८ लाख ८ हजार ५ सय ८२ मत प्राप्त गरेको छ।
यस्तै, श्रम संस्कृति पार्टी र राष्ट्रिय प्रजातन्त्र पार्टी (राप्रपा) ले समानुपातिकमा ४/४ सिट पाउने देखिएको छ। श्रम संस्कृतिले प्रत्यक्षमा ३ सिट जितेकाले उसको कुल सिट संख्या ७ पुग्नेछ भने राप्रपाले प्रत्यक्षमा १ सिट जितेकाले कुल ५ सिट हुनेछ।
निर्वाचन आयोगका अनुसार समानुपातिक मतगणना सकिएकाले अब सिट बाँडफाँटको औपचारिक प्रक्रिया अघि बढ्नेछ। आयोगले सदर मतका आधारमा सिट निर्धारण गरेपछि दलहरूलाई तीन दिनभित्र समानुपातिक बन्दसूचीबाट नाम सिफारिस गर्न पत्राचार गर्नेछ। त्यसपछि आयोगले नामहरूको परीक्षण गरी निर्वाचित सांसदहरूलाई प्रमाणपत्र प्रदान गर्नेछ।
