काठमडौ । सभामुख अग्निप्रसाद सापकोटाले आह्वान गरेको सर्वदलीय बैठकमा संसद् सुचारु गराउन प्रमुख प्रतिपक्ष दल एमालेलाई समेत सहमतिमा ल्याएर संसद् सुचारु गराउन सरकार र सत्तारुढ दलहरूले गम्भीर पहल गर्ने महत्वपूर्ण सहमति भएको छ ।
सभामुख सापकोटाले राष्ट्रिय महत्वका विषयमा सबै राजनीतिक दलहरूबीच सहमति हुनु राम्रो हुने बताएका छन् । संघीय संसद् सचिवालयमा प्रधानमन्त्री शेरबहादुर देउवासहित चार घण्टाको सर्वदलीय बैठकपछि सभामुख सापकोटाले भने, राष्ट्रिय महत्वका विषयमा आम सहमति बन्दा धेरै राम्रो कुरा हुन्छ । सहमति गर्नका लागि सबैले पहल र प्रयत्न गर्ने कुरा भएको छ ।
सर्वदलीय बैठकपछि प्रतिक्रिया दिँदै सभामुख सापकोटाले राष्ट्रिय महत्वका विषयमा राष्ट्रिय सहमतिका लागि पहल गर्न भूमिका खेल्न आग्रह गरेको बताए । एमसीसी आगामी बैठकमा टेबुल हुने कि नहुने टुंगो लाग्न बाँकी रहेको उनले बताए । एमसीसीबारे सबैका कुरा सुनिरहेको र अन्तिममा आफ्नो भूमिका अनुसार कार्य गर्ने बताउँदै सभामुख सापकोटाले सभामुखको भूमिका अम्पायर र निर्णायकको भएको भनाइ राखेको थियो ।
संसदमा विचाराधीन नागरिकतासँग सम्बन्धित विधेयक, हवाई उडानसँग सम्बन्धित विधेयकलगायतका जनसरोकारका विधेयकहरू पारित हुने वातावरण बनाउन आफूले प्रधानमन्त्री शेरबहादुर देउवा र दलका नेताहरूको ध्यानाकर्षण गरेको पनि बताए ।
प्रमुख प्रतिपक्ष दल नेकपा एमालेलाई सहमतिमा ल्याएर संसद् सुचारु गराउने विषयमा छलफल गरिएको सत्तारुढ नेकपा (एकीकृत समाजवादी)का सांसद जीवनराम श्रेष्ठले बताए । उनले एमालेले जुन विषय उठाएर जनताको सार्वभौम थलो संसद्लाई अवरुद्ध पारिरहेको छ, त्यो गैरकानुनी, असंवैधानिक र गलत रहेको बताए ।
‘संसद्लाई कसरी सुचारु गर्ने भन्ने विषयमा केन्द्रित भएर छलफल भएको छ । त्यसैगरी संसदमा विचाराधीन ४२ वटा विधेयकहरूलाई अघि बढाउने विषयमा पनि छलफल गरिएको छ, सांसद श्रेष्ठले भने, ‘प्रतिपक्षलाई पनि सहमतिमा ल्याएर संसद् सुचारु गराउने सहमति भएको छ ।
