काठमाडौं । नियात्राकार प्रदीप सापकोटाको नियात्रा संग्रह ‘यात्राको लय’ को दोस्रो संस्करण राजधानीमा आयोजित एक कार्यक्रममा सार्वजनिक गरिएको छ।
बुधबार सम्पन्न कार्यक्रममा प्रा.डा. लक्ष्मणप्रसाद गौतम, साहित्यकार श्रीओम श्रेष्ठ ‘रोदन’, समालोचक प्रमोद प्रधान, डा. सृजना शर्मा, छविरमण सिलवाल, लेखनाथ हुमागाईं, केशव पराजुलीलगायतले संयुक्त रूपमा कृतिको लोकार्पण गरे।
कार्यक्रमका प्रमुख अतिथि प्रा.डा. गौतमले सापकोटाको नियात्रा सरल भाषाशैलीमा लेखिएको र पाठकलाई निरन्तर अघि बढ्न प्रेरित गर्ने सामर्थ्य भएको टिप्पणी गरे।
कृतिमाथि चर्चा गर्दै वरिष्ठ समालोचक प्रमोद प्रधानले ‘यात्राको लय’ द्वन्द्वकालीन समयको अनुभूतिलाई समेट्ने कृति भएको बताए। उनले लेखकले साना–साना दृश्यलाई आत्मीय र अनुभूतिमय ढंगले प्रस्तुत गरेको उल्लेख गरे।
लेखकका गुरु लेखनाथ हुमागाईंले सापकोटाको साहित्यिक यात्राप्रति खुसी व्यक्त गर्दै उनको विद्यालय जीवनदेखि देखिएको लेखन रुचिको स्मरण गरे।
चर्चाकार डा. सृजना शर्माले कृतिमा यात्राका क्रममा भोगिएका दुःख–पीडा, राष्ट्रिय भावना र छिमेकी मुलुकको हेपाहा प्रवृत्तिबारे सशक्त अभिव्यक्ति पाइने बताइन्। उनले कृतिले पाठकलाई पूर्वदेखि सुदूरपश्चिमसम्मका विभिन्न भूगोलमा घुमाउने अनुभव दिने धारणा राखिन्।
श्रीओम श्रेष्ठ ‘रोदन’ले सापकोटा नियात्रासँगै निजात्मक निबन्ध लेखनमा पनि सक्रिय स्रष्टा भएको बताए।
कार्यक्रममा भुँडीपुराण प्रकाशनका केशव पराजुली, साहित्यिक पत्रकार संघका अध्यक्ष राधेश्याम लेकाली, नियात्राकार पवन आलोक र साहित्यकार किशोर पहाडीले शुभकामना मन्तव्य व्यक्त गरेका थिए।
कार्यक्रमको सभापतित्व श्रीओम श्रेष्ठ ‘रोदन’ले गरेका थिए।
लेखक सापकोटाले आफू लेखनप्रति रुचि राख्ने व्यक्ति भए पनि असल पाठक हुनु आफ्नो पहिलो पहिचान भएको बताए।
सुनकोसी वाङ्मय प्रतिष्ठानको आयोजनामा सम्पन्न कार्यक्रमको सहजीकरण प्रतिष्ठानका अध्यक्ष छविरमण सिलवालले गरेका थिए भने स्वागत मन्तव्य कोषाध्यक्ष तारा केसीले राखेकी थिइन्।
