काठमाडौं- आहुति नेतृत्वको वैज्ञानिक समाजवादी कम्युनिस्ट पार्टी ,नेपालले माघ मसान्त र फाल्गुन १ गतेलाई संकल्प पर्वको रुपमा मनाउँदै आएको छ ।
बलिदानको स्मरण र क्रान्तिको संकल्प पर्वको अवसरमा हिजो माघ ३० गते देशैभरिका ब्युरोमा वैचारिक, राजनैतिक र सांस्कृतिक कार्यक्रम सहित सामुहिक भोजनको आयोजना गरिएको थियो।
कार्यक्रममा प्रमुख वक्ता वैज्ञानिक समाजवादी कम्युनिष्ट पार्टीका महासचिव आहुतिले वैज्ञानिक समाजवादी कम्युनिष्ट पार्टी, नेपालले नेपाली समाजको आमूल रुपान्तरणको निम्ति जनताको पक्षबाट आजसम्म भएका संघर्ष, विद्रोह र बलिदानको समग्रता १० बर्षे जनयुद्धमा प्रकट भएकाले सुरुवातको दिनलाई महाउत्सवको रुपमा मनाउने निर्णय गरेको बताउनुभयो।धार्मिक अन्धताबाट अलग्गिदै इतिहासका सम्पुर्ण संघर्ष र बलिदानीको गहिरो स्मरण अनि नयाँ व्यवस्था निर्माण गर्ने दृढ संकल्प सहितको पर्वको रुपमा संकल्प पर्व मनाउने थालिएको उहाँको भनाइ थियो ।
काठमाडौंको अनामनगरमा वैज्ञानिक समाजवादी कम्युनिस्ट पार्टी नेवा ब्युरोकाे आयोजनामा भएको कार्यक्रममा नेवा राज्यका संयोजक बुद्धलक्ष्मी महर्जनको संयोजन तथा वैज्ञानिक समाजवादी केन्द्रीय पूर्णकालीन शिविर सदस्य हयाल तामाङले राष्ट्रिय भेलाले पारित गरेको आधार पत्र वाचन गरेका थिए भने पार्टीका प्रवक्ता मदन अर्यालले कार्यक्रम सञ्चालन गरेका थिए।
फागुन १ गते पार्टी सवस्यहरुले संकल्प पर्वलाई घर घरमा सांस्कृतिक हिसावले उत्सवको रुपमा मनाउने संस्कृति निर्माण गर्दै अगाडी बढिरहेका छौं । राजनीति, अर्थतन्त्र र संस्कृतिको क्षेत्रमा आमुल परिवर्तन नगरी वैज्ञानिक समाजवाद स्थापना गर्न नसकिने र वैज्ञानिक समाजवाद स्थापना नगरी उत्पीडित राष्ट्र तथा समुदायको मुक्ति नहुने भएको भन्दै संस्कृतिको क्षेत्रमा पनि नयाँ गर्न सुरु गरेको जनाएको आधारपत्रमा उल्लेख छ ।
सोही कार्यक्रममा विजय विक र अस्मिता वादीले सह-जीवनको सुरुवात गरेका छन्।
