काठमाडौं/ललितपुरको बालकुमारीमा भएको प्रदर्शनमा संलग्न आरोपमा पक्राउ पर्नेहरुको संख्या ५० नाघेको छ । पक्राउ परेकाहरुलाई जावलाखेलस्थित जिल्ला प्रहरी परिसरमा राखिएको छ ।
मन्त्री चढ्ने गाडी प्रदर्शनकारीले जलाएसँगै प्रहरीले आन्दोलनकारीविरुद्ध गोली चलाउँदा दुई जनाको मृत्यु भएको छ । दैलेख घर भएका सुजन रावत र डोटी घर भएका विरेन्द्र शाहको मृत्यु भएको ललितपुर प्रहरी परिसरका प्रवक्ता एसपी नवराज कार्कीले जानकारी दिए।
आन्दोलनका क्रममा मृत्यु भएका दुईमध्ये एक युवकको अश्रुग्याँसका कारण मृत्यु हुनसक्ने प्रहरीले बताएका छन् । प्रहरीले अश्रुग्यास सेलले छातीमा लागेको बताए।'टियर ग्यासले लागेर ती युवकको मृत्यु भएको हो,' ललितपुर प्रहरी परिसरका प्रवक्ता एसपी कार्कीले भने ।
बालकुमारीमा अचेत अवस्थामा भेटिएका ती युवकलाई किस्ट अस्पताल पुर्याइएको थियो । अस्पताल पुर्याएको केही समयपछि मृत घोषित गरिएको हो । उनको शरीरमा गोलीको घाउ नभेटिएको चिकित्सकहरुले जानकारी दिएका छन् ।चिकित्सकहरूका अनुसार किस्ट अस्पतालमा मृत्यु भएका युवकको छातीमा निलो डाम मात्र भेटिएको छ । पोस्टमार्टमपछि मात्र मृत्युको कारणबारे खुल्ने चिकित्सकहरूले बताएका छन् । मृतकको नाम सुदन राउत रहेको एसपी कार्कीले बताए ।
सरकारले ललितपुरको बालकुमारी घटनाको छानबिन गर्न ३ सदस्यीय छानबिन समिति गठन गरेको छ ।
उपत्यका प्रहरी कार्यालयका डीआईजी लालमणि आचार्य नेतृत्वमा गृह मन्त्रालयले ३ सदस्यीय छानबिन समिति गठन गरेको छ।
समितिमा ललितपुरका सहायक प्रमुख जिल्ला अधिकारी अमरदीप सुनुवार र राष्ट्रिय अनुसन्धानका उपअनुसन्धान निर्देशक बासु सिग्देल सदस्य छन् ।
रोजगार अनुमति प्रणाली (ईपीएस) परीक्षा दिन नपाएपछि प्रदर्शन गरेका युवाहरूले भौतिक पूर्वाधार तथा यातायातमन्त्री प्रकाश ज्वालाकाे गाडीमा आगजनी गरेपछि शुक्रवार दिउँसो बालकुमारीमा झडप भएको थियो । यसक्रममा प्रहरीले अश्रुग्यास हानेको थियो ।
