काठमाडौं । राष्ट्रिय स्वतन्त्र पार्टीका सभापति रवि लामिछाने र काठमाडौं महानगरपालिकाका प्रमुख बालेन्द्र शाहबीच भएको राजनीतिक सहमतिलाई लिएर जेन–जी पुस्ताभित्र फरक–फरक प्रतिक्रिया देखिएको छ। पुराना राजनीतिक शक्तिप्रतिको असन्तुष्टि र प्रणाली सुधारको चाहनाबाट उदाएको यो पुस्ताले सहमतिलाई वैकल्पिक राजनीतिक शक्तिको सम्भावनाका रूपमा हेरे पनि यसको आधार र एजेन्डाप्रति शंका पनि व्यक्त गरेको छ।
जेन–जी आन्दोलनमा सहभागी केही घाइते तथा समर्थकहरूले रवि र बालेन्द्रबीचको सहकार्यले नयाँ राजनीतिक विकल्प निर्माण हुन सक्ने आशा व्यक्त गरेका छन्। उनीहरूका अनुसार नयाँ अनुहारहरू एक ठाउँमा आउनु सकारात्मक संकेत हो। तर आन्दोलनका केही अगुवाले भने सहमतिमा पद र शक्ति केन्द्रित संकेत देखिएको, सामाजिक तथा नीतिगत मुद्दा स्पष्ट नसमेटिएको भन्दै आलोचना गरेका छन्।
घाइते तथा अभियन्ताहरूले सहमतिले जेन–जी आन्दोलनका माग, संस्थागत सुधार र समावेशी राजनीतिक एजेन्डालाई व्यवहारमा समेट्नुपर्नेमा जोड दिएका छन्। उनीहरूका अनुसार व्यवहारमा फरक नदेखिए नयाँ भनिएका शक्ति पनि पुरानै शैलीतर्फ फर्किने जोखिम रहनेछ।
