बनेपा/लैङ्गिक हिंसा विरुद्धको १६ दिने अभियानकाे अन्तिम दिन आज बनेपामा अखिल नेपाल महिला संघ (समाजवादी) काभ्रेले दिप प्रज्वलन कार्यक्रम सम्पन्न गरेको छ।
समाजमा हुने हरेक हिंसाले कसैको पनि भलो नगर्ने बनेपामा आयोजित एक कार्यक्रमका सहभागिहरुले बताएका छन् । हरेक हिंसाले समाजमा विभेद, द्वन्द्व ल्याउनुका साथै आपसी सद्भाव र सहकार्य पनि कमजोर बन्दै जाने बताएका हुन् । ‘लैङ्गिक हिंसा अन्त्यको सुनिश्चितता : महिला र बालबालिकामा लगानीको ऐक्यबद्धता’ भन्ने नाराका साथ सुरुभएको लैंगिक हिंसाविरुद्धको १६ दिने अभियानको अन्तिम दिन काभ्रेको बनेपामा आयोजित दिपप्रज्वलनमा सहभागिहरुले यस्तो बताएका हुन् ।
कार्यक्रममा बोल्दै अखिल नेपाल महिला संघ समाजवादीका केन्द्रीय सदस्य तथा जिल्ला अध्यक्ष पासाङ डोल्माे लामाले हिंसा कुनै बाहिरको व्यक्तिबाट नभई आफन्तबाट नै हुनु दुर्भाग्यपूर्ण भएकाले यसलाई न्यूनीकरण मात्र नभएर जरैदेखि अन्त्य गर्नुपर्ने बताउनुभयो । ‘प्रायः महिलाहरू मानसिक, सामाजिक, आर्थिक हिंसाबाट पीडित भइरहेका छन्, जसले गर्दा परिवार, समाज र देशलाई नै नराम्रो प्रभाब पारिरहेको छ’ उहाँले भन्नुभयो ।
जिल्ला अध्यक्ष लामाले देशको आधाभन्दा बढी जनशक्ति महिलालाई समृद्धिको भागेदार नबनाईकन समाजवादको कल्पना समेत गर्न नसक्ने बताउनुभयो। उहाँले हिंसा हुनु भनेको कानुन उल्लंघन गर्ने कुरा भएकाले कानुन उल्लंघन गरेर अपराधको भागेदारी हुनुभन्दा पहिलेनै सजग हुनु राम्रो उपाय हुने बताउनुभयो । कुनै पनि खाले हिंसा नगर्न र हिंसा हुन नदिन सबै सचेत हुनुपर्नेमा उहाँको जोड छ ।
पछिल्लो समय दैनिक रूपमा कुनै न कुनै किसिमको हिंसा हुने गरेको उहाँको भनाइ थियो । शारीरिक, मानसिक, यौनजन्य, सामाजिक, आर्थिक रूपमा पनि हिंसा हुने गरेको उहाँले बताउनुभयो। कार्यक्रममा महिला नेतृ र सरोकारवालाहरुको सहभागिता रहेको थियो ।
