काठमाडौं/पारिजात स्मृति केन्द्रको ३१ औं वार्षिक साधारणसभा पारिजात स्मृति भवन म्हेपिमा सम्पन्न भयो ।
पारिजात स्मृति केन्द्रका अध्यक्ष मातृका पोखरेलको सभापतित्वमा भएको उक्त साधारण सभाको प्रथम सत्रको कार्यक्रममा स्मृति केन्द्रका पूर्व अध्यक्षहरू नारायणभक्त श्रेष्ठ (रायन), डा. महेश मास्के, डा. राजेन्द्रप्रसाद अधिकारीले शुभकामना मन्तव्य व्यक्त गर्नुभएको थियो भने उपाध्यक्ष इन्दिरा दलीले स्वागत मन्तव्य राख्नु भएको थियो ।
साधारणसभाको दोस्रो सत्रमा महासचिव दीलसुन्दर श्रेष्ठ ( दील वरदान ) ले प्रस्तुत गर्नुभएको वार्षिक प्रतिवेदन र कोषाध्यक्ष डा. विन्दु शर्माले प्रस्तुत गर्नुभएको आ.व. २०८० / ०८१ को लेखा परीक्षण प्रतिवेदन सर्वसम्मत रुपमा पारित भएको थियो । स्मृति केन्द्रका कानुनी सल्लाहकार वरिष्ठ अधिवक्ता उषा मल्ल पाठकको संयोजकत्वमा नारायणभक्त श्रेष्ठ (रायन) र डा. राजेन्द्रप्रसाद अधिकारी सदस्य रहनुभएको निर्वाचन कमिटिले निर्वाचनको सम्पूर्ण प्रकृया पुऱ्याएर सर्वसम्मत रूपमा अध्यक्ष - इन्दिरा दली, उपाध्यक्ष - सीता शर्मा, महासचिव - दिलसुन्दर श्रेष्ठ, कोषाध्यक्ष - डा. बिन्दु शर्मा र सदस्यहरू डा. महेश मास्के, अमृता शर्मा, केशव सिलवाल, राजेन्द्र महर्जन र मातृका पोखरेल रहेको कार्यसमिति घोषणा गरिएको थियो । निर्वाचित समितिलाई निवर्तमान अध्यक्ष मातृका पोखरेलले शुभकामना दिनुभएको थियो भने नवनिर्वाचित अध्यक्ष इन्दिरा दलीले प्रतिबद्धता मन्तव्य व्यक्त गर्नुभएको थियो ।
स्मृति केन्द्रका महासचिव दीलसुन्दर श्रेष्ठले दुवै सत्रको संचालन गर्नुभएको थियो ।
