धुलिखेल । स्थानीय तह निर्वाचन सम्पन्न भएको ११ दिन बित्दासमेत अन्तिम मत परिणाम घोषणा हुन सकेको छैन । कुल ७५३ स्थानीय तहमध्ये हालसम्म ७४१ स्थानीय तहको नतिजा घोषणा भएको र १२ पालिकाको घोषणा हुन बाँकी रहेको निर्वाचन आयोगले जनाएको छ ।
आयोगका अनुसार स्थानीय तहको प्रमुखतर्फ २९१ तथा अध्यक्षतर्फ ४६० स्थानको नतिजा घोषणा भएको हो ।
जसअनुसार नेपाली काँग्रेसले १३४ प्रमुख र १८८ अध्यक्षमा जितेको छ । काँग्रेसले अझैपनि ४ प्रमुख पदमा अग्रता कायमै राखेको छ । यस्तै नेकपा एमालेले स्थानीय तहका ७९ प्रमुख तथा १२३ अध्यक्ष पद जित्दा ३ प्रमुखमा अग्रता कायमै राखेको छ ।
यसैगरी तेस्रो स्थानमा रहेको नेकपा माओवादी केन्द्रले २५ प्रमुख र ९६ अध्यक्ष पद जित्दा अझैपनि प्रमुख १ पालिकामा अग्रता कायमै राखेको छ । यस्तै एकीकृत समाजवादीले ११ प्रमुख र ८ अध्यक्ष जित्दा अन्य पार्टी र स्वतन्त्र उम्मेदवारले २५ पालिका जितेका छन् । यस्तै गाउँपालिकातर्फ जसपाले २१ स्थानीय तह जित्दा एकीकृत समाजवादी, लोसपा, जनमतलगायतका पार्टी र स्वतन्त्र उम्मेदवारले ३२ पालिकामा जित हासिल गरेका छन् ।
