काठमाडौं/प्रदेश सरकारको नेतृत्वको विषयलाई लिएर सत्ता गठबन्धनबीच भागबन्डा मिलेको छ।
गठबन्धन दलका नेताहरूको आइतबार बालुवाटारमा बसेको बैठकले बाँकी रहेका ६ वटा प्रदेशको बाँडफाँट पनि टुंगो लगाएको हो।
भागबन्डाअनुसार गण्डकी र लुम्बिनी प्रदेशमा नेकपा एमालेको नेतृत्वमा सरकार बन्नेछ भने कर्णाली प्रदेशमा नेकपा माओवादी केन्द्रको नेतृत्वमा सरकार बन्नेछ।
बैठकले बागमती र सुदूरपश्चिम प्रदेशमा भने एमाले र माओवादीबीच आलोपालो सरकारको नेतृत्व गर्ने तथा मधेस प्रदेशमा जसपा र जनमतले आलोपालो सरकार बनाउने सहमति भएको बैठकबाट बाहिरिँदै राप्रपाका अध्यक्ष राजेन्द्र लिङदेनले जानकारी दिए।
सात प्रदेशमध्ये आइतबार प्रदेश नम्बर १ मा नेकपा एमालेका हिक्मत कार्की मुख्यमन्त्री नियुक्त भइसकेका छन्। बाँकी रहेका ६ प्रदेशको भागबन्डा पनि नेताहरूले टुंग्याएका हुन्।
तीन प्रदेशमा आलोपालो नेतृत्व गर्ने दलहरूबीचको सहमतिअनुसार सुदूरपश्चिम प्रदेशमा पहिले एमालेले नेतृत्व गर्नेछ भने दोस्रो चरणमा माओवादीले नेतृत्व गर्नेछ।
त्यस्तै, बागमतीमा पहिले माओवादीले नेतृत्व गर्नेछ भने त्यसपछि दोस्रो चरणमा एमालेले नेतृत्व गर्नेछ।
जसपा र जनमत पार्टीबिच भएको आलोपालो गर्ने सहमतिअनुसार मधेस प्रदेशमा पहिलो चरणमा जसपाले सरकारको नेतृत्व गर्नेछ भने दोस्रो चरणमा जनमत पार्टीले नेतृत्व गर्ने छ।
प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एमालेका अध्यक्ष केपी शर्मा ओली, राष्ट्रिय स्वतन्त्र पार्टीका रवि लामिछाने, जसपाका उपेन्द्र यादव, राप्रपाका राजेन्द्र लिङदेन तथा जनमत पार्टीका अध्यक्ष सीके राउतको सहभागिता बैठक बसेको थियो।
