काठमाडौं । प्रशिद्ध भारतीय गायिका लता मंगेशकरको निधन भएको छ । उनको आइतबार बिहान मुम्बइमा निधन भएको भारतीय सञ्चारमाध्यमले जनाएका छन् ।
वरिष्ठ गायिका लता मंगेशकरको निधनमा भारत सरकारले दुईदिने राष्ट्रिय शोकको घोषणा गरेको छ । भारतको सर्वोच्च पदक ‘भारत रत्न’द्वारा समेत विभूषित विश्व चर्चित गायिका लताको शोकमा दुई दिन राष्ट्रिय झण्डा आधा झुकाउने निर्णय भएको छ ।
राष्ट्रिय ध्वजा संहिताअनुसार राजकीय शोकमा संसद, सचिवालय, विधानसभा, अन्य महत्वपूर्ण राष्ट्रिय भवन तथा सबै सरकारी कार्यालयमा राष्ट्रिय झण्डा आधा झुकाइनेछ । समाचार एजेन्सी एएनआईका अनुसार लताको पार्थिव शरीरको अन्तिम संस्कार आइतबार साँझ साढे ६ बजे राजकीय सम्मानका साथ मुम्बईको शिवाजी पार्कमा गरिनेछ ।
स्वर कोकिलाका नामले समेत पुकारिने लताको ९२ वर्षको उमेरमा निधन भएको हो । समाचार संस्था पिटिआइका अनुसार झण्डै ८ दशक लामो गायन यात्रामा ३६ भाषामा हजारौँ गीत गायकी लताको मुम्बईस्थित अस्पतालमा उपचारकै क्रममा निधन भएको हो । उनलाई पछिल्लो दिनमा भेन्टिलेटरमा राखिएको थियो ।
मुम्बईको ब्रिच क्याण्डी अस्पतालमा लता मंगेशकरको उपचार भइरहेको थियो । उनलाई कोरोना संक्रमणसँगै निमोनिया भएको थियो। संक्रमण पुष्टि भएपश्चात जनवरी ८ मा उनी अस्पताल भर्ना भएकी थिइन् ।
भारत रत्नबाट सम्मानित मंगेशकरले भारतीय चलचित्रमा धेरै कालजयी गीत गायकी छन् ।
महान पाश्र्वगायिका लता मंगेशकरले चलचित्र संगीतलाई नयाँ परिभाषा प्रदान गरेको मानिन्छ । उनले ३० हजार भन्दा बढी गीत गायकी छन् ।
लताको जन्म सन् १९२९ को सेप्टेम्बर २८ मा भारतको इन्दौरमा भएको थियो । उनका पिता पण्डित दीनानाथ मंगेशकर पनि गायक थिए । उनी रंगमञ्च कलाकार पनि हुन् । उनी पाँच सन्तान मध्ये जेठी हुन् ।
उनले चलचित्रमा अभिनय पनि गरेकी छन् । आर्थिक अवस्था सुधारका लागि उनले अभिनय गरेको एक अन्तर्वार्तामा बताएकी थिइन् । उनले मराठी र हिन्दी गरी ८ चलचित्रमा काम गरेकी छन् ।
उनले सन् १९४९ को चलचित्र महलका लागि पहिलो हिन्दी चलचित्रका लागि गीत गाएकी थिइन् । त्यसपछिका चार दशक उनले हिन्दी चलचित्रमा हजारौँ गीत गाइन् ।
पाकिजा, मजबूर, आवारा, मुगल–ए–आजम, श्री ४२०, अराधना, दिलवाले दुल्हनिया ले जाएंगेसहितका चलचित्रमा उनले गीत गाएकी छन् ।
सन् १९६२ मा चीनसँगको युद्धमा शहीद भएको भारतीय सैनिकको सम्मानमा उनले ऐ मेरे वतन के लोगोँ गीत गाएकी थिइन्, सो गीत सुनेर भारतका पहिलो प्रधानमन्त्री पण्डित जवाहर लाल नेहरु रोएका थिए ।
