भुम्लु/ काभ्रेपलाञ्चोक जिल्लाको भुम्लु गाउँपालिकाका मतदाताहरु गठबन्धनको पक्षमा देखिएका छन ।
आज भुम्लुको फलाँटेमा गठबन्धनले कोणसभा संपन्न गरेको छ । कोणसभालाई नेकपा (एकीकृत समाजवादी) का केन्द्रीय सदस्य एवं बागमती प्रदेशका सांसद लक्ष्मण लम्सालले राजनीतिक मुद्दालाई संस्थागत गर्न गठबन्धन बनेको दाबी गर्दै पालिका अध्यक्ष पदका साझा उम्मेद्ववार प्रेमबहादुर भुजेल र उपाध्यक्ष पदका उम्मेद्ववार जितेन्द्रमान लामा (दावा) लाई अत्याधिक मत दिएर जिताउन अपिल गर्नुभयो ।
दुवै उम्मेद्ववार युवाको समेत प्रतिनिधित्व गर्ने भएकाले गठबन्धनबाट निर्वाचित जनप्रतिनिधिले जनाताको हित विपरित कुनै पनि काम नगर्ने ठोकुवा समेत गर्नुभयो । उहाँले एमालेको नेतृत्वमा भएको स्थानीय सरकारले जनताको भावना अनुसार काम गर्न नसक्दा जनतामा वितृष्णा जागेको बताउनुभयो ।
कांग्रेस प्रदेश समिति सदस्य तस्बिर लामाको सभाध्यक्षतामा भएको कार्यक्रममा नेकपा (एकीकृत समाजवादी)का भुम्लु गाउँपालिका कमिटी अध्यक्ष प्राणनाथ न्यौपाने, विद्यार्थी नेता बदन भण्डारी लगायतका नेताहरूले सम्बोधन गर्नुभएको थियो ।
