मंगलटार । काभ्रेपलाञ्चोकको रोशी गाउँपालिका–९ सल्लेनीस्थित भूमेस्थान प्राथमिक विद्यालयका विद्यार्थीहरूलाई विभिन्न शैक्षिक सामग्री प्रदान गरिएको छ।
लायन्स क्लव अफ काठमाडौं ओमबुद्ध र लायन्स क्लव अफ काठमाडौं नमोबुद्धको सहयोगमा विद्यालयमा अध्ययनरत बालबालिकालाई ट्रयाकसुट सेट, कापी, सिसाकलम, रङ लगायत आवश्यक शैक्षिक सामग्री वितरण गरिएको विद्यालय व्यवस्थापन समितिका अध्यक्ष चन्द्रबहादुर लामाले जानकारी दिनुभयो।
कार्यक्रम रोशी गाउँपालिकाका प्रमुख प्रशासकीय अधिकृत टंकबहादुर नेगीको प्रमुख आतिथ्यतामा सम्पन्न भएको थियो। कार्यक्रममा लायन्स क्लब अफ काठमाडौं ओमबुद्ध ३२५L का जोन चेयरपर्सन कान्छामान तामाङ, लायन्स क्लव अफ काठमाडौं नमोबुद्धका अध्यक्ष भीमबहादुर तामाङ, एरिया इञ्चार्ज नवीन बज्र लामा तथा सदस्य सुवास कार्कीको उपस्थिति रहेको थियो।
कार्यक्रममा बोल्दै जोन चेयरपर्सन कान्छामान तामाङले ग्रामीण क्षेत्रका विद्यार्थीलाई अध्ययनप्रति थप उत्साह र प्रेरणा मिलोस् भन्ने उद्देश्यले सामग्री वितरण गरिएको बताउनुभयो।
विद्यालयका प्रधानाध्यापक सिता कुमारी दर्लामीले प्राप्त सामग्रीले विद्यार्थीहरूको शैक्षिक गतिविधिमा सकारात्मक सहयोग पुग्ने विश्वास व्यक्त गर्नुभयो।
