नेपालमा अब कोरोना संक्रमण घट्दै

 विज्ञ भन्छन्– संक्रमणदर ओरालो लाग्दै छ, आगामी सातादेखि घट्छ, मृतकको संख्या बढ्न सक्छ 

काठमाडौं । नेपालमा गएको २४ घण्टामा ६ हजार ८२७ जना संक्रमित थपिएका छन् । स्वास्थ्य तथा जनसंख्या मन्त्रालयले दिएको जानकारी अनुसार पछिल्लो २४ घण्टामा १९ हजार ८६९ जनाको नमूना परीक्षण गर्दा ६ हजार ८२७ जनामा कोरोना पुष्टि भएको हो ।

मन्त्रालयका अनुसार, काठमाडौंमा २१५३, ललितपुरमा ५१९ र भक्तपुरमा २६८ जनामा कोरोना पुष्टि भएको छ ।

त्यस्तै पछिल्लो २४ घण्टामा ५ हजार ४ सय ३२ जना कोरोना संक्रमणमुक्त भएका छन् भने १० जनाको मृत्यु भएको छ । योसँगै देशभर कोरोनाका सक्रिय संक्रमितको संख्या ८९ हजार ९ सय ४१ पुगेको छ ।

माघ महिनाको पहिलो सातायता नेपालमा कोभिड–१९ संक्रमण उच्च रह्यो । दोस्रो साता आइपुग्दा यो संख्या स्थिर छ । माघको दोस्रो साता नेपालमा कोभिड–१९ संक्रमण उच्च भएर क्रमशः घट्दै जाने सरकारको आंकलन थियो । गत साताको तुलनामा पछिल्ला दिनहरुमा दैनिक संक्रमणदर बढेको देखिँदैन ।

नेपालमा पछिल्लो साता देखिएको कोभिड–१९ को संक्रमणलाई तेस्रो लहरको उच्च बिन्दुको रुपमा विज्ञहरुले व्याख्या गरेका छन् । अहिलेको लहरमा नै संक्रमितको संख्या यो भन्दा उच्च हुने सम्भावना नरहेको उनीहरुको आंकलन छ । “यो साता नेपालमा कोभिड संक्रमण उच्च बिन्दुमा पुग्यो अब क्रमशः ओरालो लाग्दै जान्छ । आगामी सातादेखि संक्रमण ओरालो लाग्दै जान्छ । जोखिमयुक्त क्षेत्रमा संक्रमितको संख्या केही बढ्नसक्छ ।

अस्पतालमा कोभिड संक्रमितको चाप कम हुँदै जानु, समुदायमा अधिकांशमा संक्रमण भइसक्नु र अधिकांश संक्रमित होम आइसोलेसनमा नै रहेर निको हुनुले नेपालमा यो लहरमा अब कोभिड–१९ को संक्रमण उच्च हुने सम्भावना कम रहेको विज्ञहरुको दाबी छ ।