काभ्रे बार इकाइको निर्वाचन
काभ्रे बारको अध्यक्षमा हरिशरण दाहाल निर्वाचित

धुलिखेल/नेपाल बार एशोसिएसन काभ्रे इकाईमा हरिशरण दाहाल निर्वाचित भएका छन् । हरिशरण दाहालले नेपाली काँग्रेस निकट जयराम थापा समुहलाई एक मतले पराजित गरेका हुन् । दाहाललाई एमाले, माओवादी, बैद्य समुह तथा नेपाली काँग्रेसको विद्रोही समुहले समर्थन गरेको थियो ।

नेपाली कांग्रेस निकट उम्मेदवार थापालाई एकीकृत समाजवादी निकट कानून ब्यवसायीहरुले समर्थन गरेका थिए । केही स्वतन्त्र कानून ब्यवसायीहरु दुवैतर्फ विभाजन भएका थिए । हरिशरण दाहालको समुहबाट नेपाली काँग्रेस निकट निरोजप्रसाद नेपाल उपाध्यक्षमा, सचिवमा नारायणध्वज तामाङ, कोषाध्यक्ष मुकुन्द मुनाकर्मी, सह सचिव लालतारा अधिकारी निर्वाचित भएका छन्

सदस्यहरुमा सुरज तिमल्सिना, सुविस्ता जोशी, दिपेन्द्र दनुवार, सुरेशकुमार केसी, राजेन्द्र पण्डित,  उमा थापा तथा जयराम थापा समुहबाट रमिता मानन्धर र महेन्द्र थिङ निर्वाचित भएका छन्। 

पार्षदमा विजयभक्त श्रेष्ठ, श्यामकृष्ण खत्री, कुमारप्रसाद भट्टराई, फडिन्द्र कार्की, कुमार थापा र रामप्रसाद मानन्धर निर्वाचित भएका छन्। 

मतदानका लागि १ सय २३ सदस्यीय मतदाता सूची सार्वजनिक भए पनि १ सय १५ खसेको थियो । अध्यक्ष, उपाध्यक्ष, सचिव, सह सचिव, कोषाध्यक्ष सहित १३ सदस्यीय कार्य समिति र ६ जना केन्द्रिय पार्षदमा निर्वाचित भएका छन् । बार एशोसिएसन काभ्रेमा नेपाली काँग्रेस निकट ४३, नेकपा एमाले निकट ३४, नेकपा समाजवादी निकट १५, नेकपा माओवादी निकट १०, बैद्य समुह निकट ८ र स्वतन्त्र १३ कानून ब्यवसायी थिए । 

पुर्व अध्यक्ष कृष्णप्रसाद सापकोटाको अध्यक्षतामा प्रदिप सापकोटा र प्रतिभा खत्री रहेको निर्वाचन समिति गठन गरिएको थियो ।सोहि समितिले निर्वाचन गराएको थियो ।