प्रदेश राजधानी ‎हेटौंडा जोड्ने ‘जनमुक्ति मार्ग’को घर्तिछाप खण्डमा कालोपत्रे हुँदै
प्रदेश राजधानी ‎हेटौंडा जोड्ने ‘जनमुक्ति मार्ग’को घर्तिछाप खण्डमा कालोपत्रे हुँदै

‎घर्तिछाप । काभ्रेपलाञ्चोक जिल्लाको डाँडापारी क्षेत्रकाे विकट महाभारत गाउँपालिका र खानीखोला गाउँपालिका हुँदै मकवानपुरको झुरझुरे भएर बागमती प्रदेश राजधानी हेटौंडा जोड्ने ‘जनमुक्ति मार्ग’ को घर्तिछाप खण्डको सडक कालोपत्रे सुरु भएको छ । प्रदेश सरकारको आर्थिक सहयोगमा डाँडापारी क्षेत्रलाई प्रदेश राजधानी जोड्ने मुख्य सडक सञ्जाल ‘जनमुक्ति मार्ग’ सडकखण्ड अन्तर्गत महाभारत गाउँपालिकाको देवीटार–घर्तिछाप–सोलाभञ्ज्याङ अन्तर्गत घर्तिछापको डबली उकालोमा ढलानको काम थालनी गरेको हो ।

‎पूर्वाधार विकास कार्यालय धुलिखेल काभ्रेपलाञ्चोकका इञ्जिनियर भुपेन्द्र कोइरालाले सडकको घुम्ती र उकालोमा गरेर एक हजार ८०० मिटर ढलानको काम सम्पन्न गरिसकेको र मंगलवारबाट कालोपत्रेको काम थालनी गरेको बताउनुभयो । मंगलवारबाट घर्तिछापको डबलीबाट कालोपत्रेको काम सुरु गरेका छौं ।’ उहाँले भन्नुभयो, ‘आगामी असार मसान्तसम्ममा करिब चार किलोमिटरको कालोपत्रे सम्पन्न गर्ने लक्ष्य छ ।’ जनमुक्ति मार्ग सडकखण्ड अन्तर्गत देवीटार–घर्तिछाप–गोकुले सडकखण्डको करिब ९ किलो मिटरको काम अहिलेसम्ममा ६५ प्रतिशत भौतिक प्रगती र ५२ प्रतिशत आर्थिक प्रगती भएको उहाँले बताउनुभयो । सो सडकखण्डको लागि सन्तोषी धर्म एस जेभीले ३९ करोड ७४ लाख ५५ हजारमा ठेक्का प्राप्त गरी निर्माण कार्य अगाडी बढाईरहेको र २०८२ साल चैत मसान्तसम्ममा सकाउनु पर्ने सम्झौता रहेको छ ।

‎महाभारत गाउँपालिका अध्यक्ष कान्छालाल जिम्बाका अनुसार महाभारत गाउँपालिका वडा नंं ६ को देवीटारस्थित बनखुखोलादेखि वडा नं. ८ को घर्तिछापसम्मको सडकखण्डमा ढलान र कालोपत्रेको कामले तिब्रता लिईरहेको छ । खण्ड–खण्डमा विभाजन गरी भईरहेको निर्माण कार्यले राम्रो गति लिईरहेको र काम पनि सन्तोषजनक रुपमा भईरहेको उहाँले बताउनुभयो । उहाँका अनुसार देवीटारदेखि सोलाभञ्ज्याङसम्मको एउटा खण्ड, सोलाभञ्ज्याङदेखि गोकुले–छोटेसाहन अर्को खण्ड, छोटेसाहन–सिक्रेदोभान–भोर्लेनी अर्को खण्ड र तीनखुट्टे–बुढाखानी–रजबास अर्को खण्ड गरी काम अगाडी बढिरहेको छ ।

‎सो सडकखण्डको डाँडापारिस्थित महाभारत र खानीखोला गाउँपालिका हुँदै मकवानपुरको झुरझुरे जोड्ने सडकखण्ड अन्तर्गत देवीटार–घर्तिछाप–गोकुले–छोटेसाहन–तालढुंगा खण्डको महाभारत गाउँपालिकाको घर्तिछापस्थित सोलाभञ्ज्याङमा २०८० साल पुस ६ गते तत्कालिन बागमती प्रदेशका भौतिक पूर्वाधार विकासमन्त्री युवराज दुलाल र प्रदेश सभा सदस्य रत्न प्रसाद ढकालले संयुक्त रुपमा शिलान्यास गर्नुभएको थियो ।

‎अध्यक्ष जिम्बाका अनुसार तीनखुट्टे–बुढाखानी–रजबास अर्को खण्ड अन्तर्गतको १७ किलोमिटरमा करिब तीन किलोमिटरको ढलानको काम सम्पन्न भईरहेको र कालोपत्रे गर्ने काम मात्रै बाँकी रहेको छ । तर सो सडक खण्डको सबैभन्दा पहिलो पटक करिब पाँच वर्ष अगाडी ठेक्का भएर काम थालनी गरेको तीनखुट्टे–घ्याब्रिङ–देवीटार सडकखण्डको काम भने अझै सम्पन्न भएको छैन । पटक पटक म्याद थप गरेपनि काम सम्पन्न नगरेपछि समयमा काम सम्पन्न गर्नका लागि पालिकाले प्रदेश सरकारलाई ध्यानाकर्षण गराईरहेको गाउँपालिकाले जनाएको छ ।