बनेपा/असार ३१ गते बिहान ७:३० बजेतिर पुण्यमाता खोलामा मृत अवस्थामा भेटिएका दिपेन्द्र खड्का सवार मोटरसाईकललाई जिपले ठक्कर दिएको पाइएको छ । खड्काले चलाएको प्र ३–०२–००७ प ५४११ नम्बरको मोटरसाइकल सडकबाट करिब ५/६ मिटर मात्रै तल खोलामा भेटिएको थियो।
अनुसन्धानको क्रममा पनौतीबाट बनेपातर्फ आउँदै गरेको बा. ७ च. ८६२१ न.को जिपले खड्का सवार मोटरसाइकलाई ठक्कर दिएको सीसी क्यामेरा फुटेजमा देखिएको हो । नमोबुद्ध नगरपालिका वडा नम्बर १ घर भएका २४ बर्षीय खड्का पनौती नगरपालिका वडा नम्बर- ५ स्थित पुण्यमाता खोलामा बनेपाबाट पनौतीतर्फ जादैं गर्दा जिपले ठक्कर दिएपछि खोलामा खसेको बताएकाे छ।
खड्काको मोटरसाइकललाई ठक्कर दिने जिप र जिप चालक सिन्धुपाल्चोक जिल्लाको मेलम्ची नगरपालिका वडा नम्बर १ का २६ बर्षीय भेषराज चौलागाईलाई काभ्रे प्रहरीले नियन्त्रणमा लिएको छ ।
चौलागाईलाई इलाका प्रहरी कार्यालय बनेपामा राखेर अनुसन्धान भैरहेको जिल्ला प्रहरी कार्यालय काभ्रेपलाञ्चोकले जनाएको छ । मोटरसाइकल खसेको समयमा उक्त जिप सोही ठाउँमा आइपुगेको र करीब ३० सेकेण्ड रोकिएर श्रीखण्डपुर तर्फ लागेको बताइएको छ ।
खड्का ड्राइभिङ सेन्टर सञ्चालक हुन् । खड्काको मृत्यु शंकाप्द रहेको भन्दै उनका आफन्तहरुले सीसी क्यामेरा हेर्न प्रहरीलाई अनुरोध गरेका थिए ।
