काठमाडौँ – प्रधानमन्त्री शेरबहादुर देउवाले शुक्रबार गर्नु भएको सम्बोधनमा चुनावबारे गोलमटोल कुरा गरेका छन् प्रधानमन्त्री देउवाले एक वर्षभित्र तीन तहको चुनाव गर्ने प्रतिबद्धता जनाएपनि कुन चुनाव गर्ने कहिले गर्ने भन्नेबारे खुलाएनन् ।
अझ आउँदो वैशाखमा गर्नुपर्ने स्थानीय तहको चुनावबारे सरकारको धारणा के हो भन्ने कुरा व्यक्त गरेनन् । केही दिनदेखि विवादित बनेको संघको चुनाव पहिले कि स्थानीय तहको चुनाव पहिले भन्नेबारे प्रधानमन्त्री देउवाले राष्ट्रका नाउँमा गरेको सम्बोधनमा उल्लेख गरेका छैनन् ।
चुनावको अन्योल प्रधानमन्त्रीको सम्बोधनले चिर्ने धेरैले अपेक्षा गरेका थिए। सत्ता घटक माओवादी केन्द्रका अध्यक्ष पुष्पकमल दाहाल प्रचण्डले स्थानीय तहको चुनाव स्थगित गरेर वैशाखमा प्रतिनिधिसभाको चुनाव गर्नुपर्ने प्रस्ताव अघि सारेपनि देउवा आफैँ उक्त प्रस्तावको विपक्षीमा रहेको बताइए पनि सम्बोधनमा त्यसबारे ठोस रुपमा व्यक्त गरेनन् । सम्बोधनका क्रममा प्रधानमन्त्री देउवाले भने, ‘आगामी १ वर्षभित्र तीनै तहको चुनाव गर्नुपर्ने कुरालाई मध्यनजर गरी सरकारले निर्वाचनका पूर्वतयारीहरु अघि बढाइरहेको बताए ।’
