काठमाडौं । चितवन निर्वाचन क्षेत्र नम्बर ३ बाट उम्मेदवार बनेकी रेनु दाहाल ले आफूले कामबाट जनताको मन जिते पनि मत प्राप्त गर्न नसकेको बताएकी छन्।
सामाजिक सञ्जाल फेसबुकमार्फत् प्रतिक्रिया दिँदै उनले विजयी उम्मेदवार सोविता गौतम लाई बधाई दिएकी छन्।
उनले लेखेकी छन्, “मैले कामद्वारा तपाईंहरूको मन जितेँ, तर मत जित्न सकिनँ। मत जित्ने सोविता गौतमलाई धेरै–धेरै बधाई दिन चाहन्छु।”
दाहालले भरतपुर महानगरपालिकाको मेयर पदको पाँच वर्षे कार्यकाल बाँकी हुँदाहुँदै राजीनामा दिएर प्रतिनिधिसभा निर्वाचनमा प्रतिस्पर्धा गरेकी थिइन्।
फेसबुक सन्देशमार्फत् उनले आफूलाई विश्वास गरेर मतदान गर्ने मतदाताप्रति आभार व्यक्त गर्दै त्यो विश्वास कहिल्यै नबिर्सने बताएकी छन्।
“यो सुनामीजस्तो लहरका बीच पनि मलाई विश्वास गरेर मतदान गर्नुहुने सम्पूर्ण मतदाताप्रति म ऋणी छु। तपाईंहरूको यो गुन कहिल्यै बिर्सने छैन,” उनले लेखेकी छन्।
दाहालले चितवनवासीको हक–हित, विकास र समृद्धिका लागि आगामी दिनमा पनि निरन्तर साथ रहने प्रतिबद्धता व्यक्त गरेकी छन्।
