काठमाडौँ, जेठ २६ –नेपाल टेलिकमको बिलिङ प्रणाली खरिदमा भ्रष्टाचार गरेको आरोपमा प्रबन्ध निर्देशक संगीता पहाडी, पूर्व प्रबन्ध निर्देशक सुनिल पौडेलसहित १८ जनाविरुद्ध अख्तियार दुरुपयोग अनुसन्धान आयोगले विशेष अदालतमा भ्रष्टाचार मुद्दा दायर गरेको छ।
टेलिकमको बिलिङ प्रणाली लगायतमा भ्रष्टाचार गरेको आरोपमा पहाडीसहित १८ जनाविरुद्ध ३३ करोड ४८ लाख रुपैयाँ बिगो माग दाबी गरिएको छ।
अख्तियारका अनुसार टेलिकमको “कस्टमर बिलिङ एण्ड रिलेसनसिप म्यानेजमेन्ट सिस्टम (CBRMS)” खरिद तथा कार्यान्वयनमा ठेक्का प्रक्रिया र सार्वजनिक खरिद ऐन विपरीत कार्य गरि राज्यलाई ठूलो आर्थिक क्षति पुर्याइएको छ। यस प्रकरणमा संलग्न रहेका उच्च तहका पदाधिकारी र निजी कम्पनीका प्रतिनिधिहरूले मिलेमतोमा भ्रष्टाचार गरेको ठहर अख्तियारले गरेको हो।
विशेष अदालतमा दायर गरिएको मुद्दामा संगीता पहाडी र सुनिल पौडेलसहित टेलिकमका तत्कालीन उच्च अधिकारी, प्राविधिक सल्लाहकार तथा ठेक्का प्राप्त कम्पनीका प्रतिनिधिहरूसमेत छन्। उनीहरूविरुद्ध सार्वजनिक पदको दुरुपयोग गरी भ्रष्टाचार गरेको अभियोगमा भ्रष्टाचार निवारण ऐनअनुसार कारबाहीको माग गरिएको छ।
अख्तियारले जारी गरेको विज्ञप्तिमा भनिएको छ, "आरोपितहरुले सार्वजनिक सम्पत्ति दुरुपयोग गरेर राज्यलाई आर्थिक क्षति पुर्याएको प्रमाण फेला परेकाले उनीहरूविरुद्ध विशेष अदालतमा मुद्दा दायर गरिएको हो।"
आरोपपत्रमा निलम्बित प्रबन्ध निर्देशक सुनिल पौडेलसमेतलाई प्रतिवादी बनाइएको छ । पौडेल भ्रष्टाचार र अकुत सम्पत्तिको मुद्दामा निलम्बन भएपछि २०८१ भदौमा सरकारले पहाडीलाई टेलिकमको प्रबन्ध निर्देशक नियुक्त गरेको थियो ।
नेपाल टेलिकमको बिलिङ प्रणाली विकासका लागि करोडौं रुपैयाँको लगानी गरिएको थियो। तर, प्रणाली प्रभावकारी रूपमा सञ्चालनमा आउन नसक्नु र खरिद प्रक्रियामा अनियमितता देखिएपछि अख्तियारले अनुसन्धान अघि बढाएको थियो।
यस घटनाले राज्य स्वामित्वको कम्पनीमा हुने उच्च तहको अनियमितता र त्यसको नियमनप्रति गम्भीर प्रश्न उठाएको छ।
