काठमाडौं । प्रधानमन्त्री केपी शर्मा ओलीले पदबाट राजीनामा दिएलगत्तै काठमाडौं महानगरपालिकाका मेयर बालेन शाहले आन्दोलनरत जेन–जी पुस्तालाई संयमित रहन अपिल गरेका छन्। उनले आन्दोलनकारीलाई वार्ताका लागि तयार रहनु पर्नेमा जोड दिँदै वार्ता अघि संसद् विघटन भएको सुनिश्चित गर्न आग्रह गरेका छन्।
सामाजिक सञ्जालमार्फत आफ्नो धारणा सार्वजनिक गर्दै मेयर शाहले लेखेका छन्, “हामीले स्पष्ट रूपमा भनेका थियौं, यो नितान्त जेन–जीको आन्दोलन हो। प्रिय जेन–जी, तपाईंहरूको हत्याराको राजीनामा आइसकेको छ। अब संयमित हुनुहोला। देशको जनधनको क्षति भनेको तपाईं–हाम्रै सम्पत्तिको क्षति हो।”
उनले थप लेखेका छन्, “अब तपाईंको पुस्ताले नै देशको नेतृत्व गर्नु पर्नेछ। तयार रहनुहोला। साथै, सेना प्रमुखसँग वार्ता गर्न पनि तयार हुनुहोला। तर याद रहोस् — वार्ता गर्नु अघि संसद् विघटन भएको हुनु पर्छ।”
जेन–जी आन्दोलन सुरु भएदेखि नै बालेन शाहलाई आन्दोलनकारीहरूले आफ्नो नेतृत्व लिइदिन आग्रह गर्दै आएका थिए। ओलीको राजीनामापछि आन्दोलन नयाँ चरणमा प्रवेश गरेको विश्लेषण भइरहेको छ।
