मकवानपुर । नौ वर्षदेखि अधूरो अवस्थामा रहेको बागमती गाउँपालिका–५ र खानीखोला गाउँपालिका–५ जोड्ने सिक्रेदोभान पुल तत्काल निर्माण गर्न माग गरिएको छ।
बागमती प्रदेशका मुख्यमन्त्री माननीय इन्द्रबहादुर बानियाँसमक्ष सामाजिक विकास मन्त्री माननीय कन्चनचन्द्र बादे उपस्थित रहेका कार्यक्रममा, प्रदेशसभा सदस्य तथा मकवानपुर–१ (क) का माननीय प्रेमबहादुर पुलामी (छिन्तु) को नेतृत्वमा सो माग राखिएको हो।
सो अवसरमा खानीखोला गाउँपालिकाका अध्यक्ष इन्द्रबहादुर थिङ (छिन्ताङ) को विशेष पहल, वडा नं ५ का अध्यक्ष बाबु लामा, समाजसेवी एवं खानीखोला डेरी तथा खुवा उद्योगका सञ्चालक निर्मल मोक्तानलगायतको सहभागिता रहेको थियो।
स्थानीय प्रतिनिधि र सरोकारवालाहरुको टोलीले मुख्यमन्त्री कार्यालय हेटौंडामा पुगेर काभ्रे र मकवानपुरलाई जोड्ने यो पुल निर्माणमा तिव्रता दिन आग्रह गरेको हो।
सडक यातायात सहज बनाउन, स्थानीयको दैनिक आवागमनलाई सुरक्षित बनाउन र क्षेत्रीय आर्थिक गतिविधि बढाउनका लागि यो पुलको निर्माण तत्काल सुरु गर्नुपर्ने माग गरिएको छ।
