काठमाडौं/देशमा आर्थिक अनुशासन खस्कँदै गएको बेला स्थानीय तहहरूमा बेरुजुको आकार दिनप्रतिदिन बढ्दो छ । संघदेखि स्थानीय तहसम्मका निकायहरूमा देखिएको अपारदर्शिता र अस्वस्थ आर्थिक अभ्यासका कारण लेखापरीक्षणमा उल्लेखित बेरुजु रकम झण्डै १३ खर्ब नजिक पुगेको छ । पाँच वर्षको अवधिमा बेरुजु दोब्बर वृद्धि भएको छ, जुन चिन्ताजनक संकेत हो ।
तर, यसैबीच काभ्रेपलाञ्चोकको महाभारत गाउँपालिकाले भने उदाहरणीय पारदर्शिता प्रदर्शन गर्दै आर्थिक वर्ष ०८०/८१ मा शून्य बेरुजु कायम गर्न सफल भएको छ । यस उपलब्धिको कदरस्वरूप महालेखा परीक्षकको कार्यालयले गाउँपालिकालाई उत्कृष्ट पालिकाका रूपमा सम्मान प्रदान गरेको हो ।
महालेखाको ६७औँ वार्षिकोत्सवका अवसरमा आयोजित समारोहमा सार्वजनिक लेखा समितिका सभापति ऋषिकेश पोखरेलले महाभारत गाउँपालिकाका अध्यक्ष कान्छालाल जिम्बालाई प्रशंसापत्र हस्तान्तरण गर्नुभयो ।
सम्मान ग्रहणपछि अध्यक्ष जिम्बाले भन्नुभयो, “निष्ठा र कानुनअनुसार कार्य सम्पादन गर्नु नै शून्य बेरुजुको प्रमुख कारण हो । हाम्रोभन्दा पनि कानुनबमोजिम काम गर्याैँ, त्यसैले यस्तो सम्भव भयो ।” उहाँले थप भन्नुभयो, “यो उपलब्धि हाम्रो संस्था, कर्मचारी, जनप्रतिनिधि र सेवाग्राही आम नागरिकको संयुक्त प्रयासको परिणाम हो ।”
महालेखाले दिएको यो सम्मानले गाउँपालिकाको पारदर्शी र उत्तरदायी आर्थिक अनुशासनप्रतिको प्रतिबद्धता पुष्टि गरेको छ । अघिल्लो वर्ष पनि शून्य बेरुजु कायम गर्न सफल भएको यस पालिकाले आफूले अवलम्बन गरेको आर्थिक अनुशासनलाई निरन्तरता दिँदै उदाहरणीय अभ्यासको सुरुवात गरेको छ ।
