बनेपा । १५औं जिल्लास्तरिय राष्ट्रपति रनिङ शिल्ड प्रतियोगिता -२०८० उपाधी बनेपा नगरपालिकाले जितेको छ ।
बनेपामा आज सम्पन्न भएको प्रतियोगितामा बनेपाले १५ स्वर्ण, ७ रजत र १० कास्य पदकसहित प्रथम भएको हो । पनौती नगरपालिकाले १४ स्वर्ण १२ रजत र २० कास्यसहित दोस्रो भएका छन् । त्यस्तै पाँचखाल नगरपालिकाले ९ स्वर्ण, १५ रजत र ९ कास्य प्राप्त गरी तेस्रो भएका छन् ।
विधागत खेलहरुतर्फ तेक्वान्दो खेलमा पनौती नगरपालिका प्रथम भएका छन् । धुलिखेल नगरपालिका दोस्रो र चौरीदेउराली गाउँपालिका तेस्रो भएका छन् । करातेतर्फ बनेपा नगरपालिका प्रथम, पनौती नगरपालिका दोस्रो र पाँचखाल नगरपालिका तेस्रो भएका छन् । छात्र भलिबलतर्फ खानीखोला गाउँपालिका प्रथम, बेथानचोक गाउँपालिका दोस्रो र रोशी गाउँपालिका र मण्डनदेउपुर नगरपालिका तेस्रो भएका छन् ।
त्यस्तै कबड्डीतर्फ छात्रामा बनेपा नगरपालिका प्रथम, पाँचखाल नगरपालिका दोस्रो र पनौती नगरपालिका तेस्रो भएका छन् भने पुरुषतर्फ बनेपा नगरपालिका प्रथम, पनौती नगरपालिका दोस्रो र मण्डनदेउपुर नगरपालिका तेस्रो भएका छन् । विजयी खेलाडी र पालिकाहरुलाई बागमती प्रदेश सभा सदस्य रुकु चौलागाई र बनेपा नगरपालिका प्रमुख शान्तिरत्न शाक्यले शिल्ड, मेडल र प्रमाणपत्र वितरण गर्नुभएको थियो ।
समापन कार्यक्रमलाई सम्बोधन गर्नुहुँदै प्रमुख अतिथि बाग्मती प्रदेश सभा सदस्य रुकु चौलागाईं र विशेष अतिथि बनेपा नगर प्रमुख शान्तिरत्न शाक्यले बिजयी खेलाडीहरूलाई बधाइ दिनुभएको थियो।
जिल्लाको १३ स्थानीय तहमध्ये १२ स्थानीय तहहरु बिच बिभिन्न खेलहरुमा प्रतिस्वर्धा गरिएको थियोे । जिल्लाको तेमाल गाउँ पालिकाले जिल्ला स्तरीय खेलमा सहभागि भएको थिएन । तेमाल गाउँ पालिकाले पालिका स्तरिय खेल संचालन नगरिएको कारण जिल्ला स्तरिय खेलमा सहभागि हुनबाट रोकिएको जिल्ला खेलकुद समितिले जनाएको छ । जिल्ला स्तरीय खेल प्रतियोगितामा प्रथम हुन सफल खेलाडीहरु प्रदेश स्तरीय प्रतियोगितामा भाग लिन पाउने काभ्रे जिल्ला खेलकुद विकास समितिका अध्यक्ष मानबीर लामाले जानकारी दिनुभयो ।
