बनेपा, काभ्रेपलाञ्चोक/बनेपा नगरपालिका वडा नम्बर- ६ स्थित त्रिवेणी टोल सुधार समिति ले २०८१ सालको माध्यमिक शिक्षा परीक्षा (एसईई) मा उत्कृष्ट सफलता हासिल गरेका टोलका ६ जना विद्यार्थीलाई बधाई तथा सम्मान गरेको छ। अध्ययनको नयाँ अध्याय सुरु हुने यस महत्वपूर्ण मोडमा टोल सुधार समितिले विद्यार्थीलाई सम्मानपत्र, माला र पुष्पगुच्छासहित सम्मान प्रदान गरेको हो।
सम्मानित हुनेमा सिताराम हुमागाईं(बुबा), आयुष हुमागाई(छोरा), रिजन लामा, स्वराज शाह ठकुरी, रिजन पौडेल र स्वहान स्याङतान छन्। उनीहरूलाई बनेपा नगरपालिका–६ का वडा अध्यक्ष सचितानन्द केसीले सम्मानपत्र र खादा त्रिवेणी टोल सुधार समितिका अध्यक्ष सुदिप पौडेलले टिका लगाइदिएका थिए।
कार्यक्रममा बोल्दै वडा अध्यक्ष केसीले एसईई सफलता जीवनको एउटा महत्त्वपूर्ण माइलस्टोन भएको उल्लेख गर्दै आगामी शैक्षिक यात्राका लागि विद्यार्थीहरूलाई शुभकामना दिए । साथै, कार्यक्रमका अतिथि वडा सदस्य लालकृष्ण तिमल्सिना, विजया सुवेदी, समाजसेवी चेतनाथ मिश्र लगायतले सम्मानित विद्यार्थीहरूलाई निरन्तर मेहनत गर्दै उच्च शिक्षा हासिल गरी टोल र समाजको नाम उज्यालो बनाउने प्रेरणा प्रदान गरे ।
सम्मानित विद्यार्थीहरूले आफूहरू आगामी दिनमा अझ लगनशीलताका साथ अध्ययन गर्दै शैक्षिक क्षेत्रमा उदाहरणीय बन्ने प्रतिबद्धता जनाए। कार्यक्रममा टोलका अभिभावक, समाजसेवीहरूको उपस्थिति रहेको थियो।
समितिका अध्यक्ष सुदिप पौडेलको सभापतित्वमाभएको कार्यक्रममा शिवप्रसाद वाग्ले शर्माले स्वागत मन्तव्य राख्नु भएको थियो। कार्यक्रम सञ्चालक तथा समितिका सचिव दिपनारायण पराजुलीलाई खानेपानी उपभोक्ता समितिमा रही टोलमा पानी खुवाउन सफल भएको भन्दै खादा ओढाएर सम्मान गर्नुका साथै सम्मान पत्र प्रदान गरेका थिए।
