बनेपा, असार १८ — बनेपा नगरपालिका–६ का वडाध्यक्ष सचितानन्द केसीले निरन्तर रूपमा विकास निर्माणमा अवरोध पुर्याउने, कानुनको छिद्र समातेर बेनामी उजुरी गर्ने र जनप्रतिनिधिमाथि चरित्र हत्या गर्ने प्रवृत्तिप्रति कडा आपत्ति जनाएका छन्।
वडाध्यक्ष केसीले भने, "जीवनसँग प्रत्यक्ष जोडिएका कार्यहरू—पानी खुवाउँदा, उद्यान बनाउँदा, सिँढी वा पिकनिक स्पट बनाउँदा, बाटो बनाउँदा, नाली वा ड्रेन निर्माण गर्दा, खोलानाला संरक्षण गर्दा, खेलमैदान बनाउँदा, स्मार्ट सिटीको परिकल्पनाअनुसार बस्ती विकास गर्दा—जताततै मुद्दा हाल्ने प्रवृत्तिहरू सक्रिय छन्। जनताको लागि काम गर्न खोज्दा हरेक पाइला मुद्दाको घेरामा पार्ने अस्वस्थ मानसिकता बढ्दो छ।"
उनका अनुसार समाजसेवाको नाममा सिन्को नभाँच्ने, बेनामी उजुरीमार्फत अवरोध खडा गर्ने र सामाजिक सञ्जाल तथा केही माध्यमहरूमा कपोलकल्पित, भ्रामक र बदनियतपूर्ण सूचना सम्प्रेषण गरेर समाजमा भ्रम फैलाउने केही व्यक्तिहरू विकास विरोधी मानसिकताका प्रतिनिधि हुन्।
"यस्ता प्रवृत्तिहरूले समाजमा नकारात्मकता मात्र फैलाउँछ," केसीले थपे, "समाजसेवाको नाममा गुटबन्दी गर्दै अरुको बदनाम गर्ने, कानुनी कारबाहीमा धकेल्ने र आफूलाई जबर्जस्त समाजसेवीको रूपमा प्रस्तुत गर्ने प्रवृत्तिलाई अब जनताले सहने छैनन्।"
वडाध्यक्ष केसीले यस्ता गतिविधिहरूले न त स्थानीय सरकारलाई शान्तिपूर्वक काम गर्न दिएको छ, न त नागरिकका समस्या समाधान गर्न सहज वातावरण मिलेको बताए। उनले यस्ता अपराधी मानसिकता भएका व्यक्तिहरूप्रति समाज आफैँले प्रतिवाद गर्ने चेतावनी पनि दिएका छन्।
"जनताले हेरेका छन्, बुझेका छन्—अहिले त हो जनताले चुप छन्, तर समय आउँछ, जब उनीहरू आफैँले यस्ता मानसिकताको मूल्यांकन गर्नेछन्," उनले भने।
