काठमाडौँ। नेपाली कांग्रेसका नवनिर्वाचित सभापति गगनकुमार थापा ले पदबहालीका क्रममा आफ्नो पहिलो हस्ताक्षर पार्टीको प्रतिबद्धतामा गर्नुभएको छ। विशेष महाधिवेशनबाट सभापतिमा निर्वाचित भएको आठ दिनपछि पार्टी केन्द्रीय कार्यालय सानेपा पुगेर उहाँले औपचारिक रूपमा जिम्मेवारी सम्हाल्नुभएको हो।
थापाले पहिलो हस्ताक्षर गरेको प्रतिबद्धतामा “बदल्यौँ कांग्रेस, बदल्छौँ देश” भन्ने मूल नारासहित देशको समुन्नतिलाई एकमात्र लक्ष्य बनाइने उल्लेख गरिएको छ। उक्त प्रतिबद्धतामार्फत कांग्रेसले नयाँ राजनीतिक यात्रा सुरु गरेको सन्देश दिन खोजिएको छ।
सभापतिले पदबहाली गरेलगत्तै विशेष महाधिवेशनबाट निर्वाचित १३५ सदस्यीय केन्द्रीय कार्यसमिति को बैठक पहिलो पटक पार्टी कार्यालयमै बसेको छ। गत पुस २७ देखि ३० गतेसम्म सम्पन्न विशेष महाधिवेशनबाट थापाको नेतृत्वमा नयाँ केन्द्रीय कार्यसमिति चयन भएको थियो।
यसैबीच, नेपाली कांग्रेसले सभापति थापालाई प्रधानमन्त्रीको उम्मेदवार का रूपमा अघि सार्ने निर्णय गरेको छ। शुक्रबार सानेपामा बसेको केन्द्रीय कार्यसमिति बैठकले उपसभापति विश्वप्रकाश शर्मा को प्रस्ताव र उपसभापति पुष्पा भुसाल को समर्थनमा उक्त निर्णय सर्वसम्मत रूपमा पारित गरेको हो।
कांग्रेसले निर्वाचनअघि नै प्रधानमन्त्रीको उम्मेदवार घोषणा गर्नुलाई मुलुकको विशिष्ट राजनीतिक परिस्थितिको माग भएको बताएको छ। संसदीय प्रणालीमा सामान्यतया निर्वाचनपछि प्रधानमन्त्री चयन हुने अभ्यास रहे पनि चुनावी अभियानकै क्रममा नेतृत्व स्पष्ट पार्दा मतदातालाई सहज हुने पार्टीको ठहर छ।
प्रस्ताव पेस गर्दै उपसभापति शर्माले मतदाताले पार्टी मात्र नभई सम्भावित प्रधानमन्त्रीको दृष्टिकोण, क्षमता र कार्यदिशा बुझेर मत दिन पाउने वातावरण सिर्जना गर्न खोजिएको उल्लेख गर्नुभयो। उहाँका अनुसार यसले राजनीतिक अनिश्चितता कम गर्नुका साथै नेतृत्वप्रति जनताको स्पष्ट छनोट स्थापित गर्न सहयोग पुग्नेछ।
सभापति थापाले जेन–जी आन्दोलनले उठाएका सुशासन, पारदर्शिता र जवाफदेहिताका मुद्दालाई आत्मसात गर्दै देशको नेतृत्व गर्न सक्ने विश्वास पार्टीको विशेष महाधिवेशनबाट बनेको शर्माको भनाइ छ। उहाँले थापामा विद्रोही ऊर्जा र संयमित नेतृत्व क्षमताको सन्तुलन रहेको दाबी गर्नुभयो।
यद्यपि, निर्वाचनअघि नै प्रधानमन्त्री घोषणा गर्नु संसदीय प्रणालीको मर्मविपरीत हुन सक्ने आशंका पनि उठिरहेका छन्। यसले संसद्को भूमिकालाई कमजोर बनाउन सक्ने तर्कबारे पत्रकारहरूको जिज्ञासामा महामन्त्री प्रदीप पौडेल ले स्पष्ट पार्नुभयो।
महामन्त्री पौडेलका अनुसार यो अभ्यास प्रत्यक्ष कार्यकारी प्रणालीतर्फ संकेत नभई, मतदातालाई आफ्नो मतको प्रत्यक्ष प्रभावबारे जानकारी गराउने प्रयास हो। उहाँले भन्नुभयो— पार्टीको उम्मेदवार जितेपछि प्रधानमन्त्री को बन्ने हो भन्ने कुरा मतदाताले पहिल्यै थाहा पाउने अवस्था सिर्जना गर्नु नै यस अभ्यासको उद्देश्य हो।
कांग्रेसले यस प्रक्रियालाई लोकतान्त्रिक अभ्यासको विकासका रूपमा अघि बढाउन खोजेको र भविष्यमा नागरिकले आफ्ना प्रतिनिधिमार्फत नेतृत्व छनोट गर्ने अधिकार अझ स्पष्ट बनाउने लक्ष्य लिएको जनाएको छ।
