काठमाडौं । ऊर्जामन्त्री कुलमान घिसिङले आफ्नो पदबाट राजीनामा दिएका छन्। उनले प्रधानमन्त्री सुशीला कार्कीसमक्ष राजीनामा पेश गरिसकेका छन्। राजीनामा दिएलगत्तै घिसिङले सिंहदरबारस्थित मन्त्रालय परिसरमा पत्रकार सम्मेलन गरी निर्णयबारे जानकारी गराएका हुन्।
जेनजी आन्दोलनको समर्थनमा गठन भएको नागरिक सरकारमा घिसिङ भदौ ३० गते मन्त्री बनेका थिए। प्रधानमन्त्री कार्कीले उनलाई ऊर्जा, जलस्रोत तथा सिंचाइसँगै भौतिक पूर्वाधार तथा यातायात र शहरी विकास मन्त्रालयको जिम्मेवारी तोकेकी थिइन्।
नेपाल विद्युत प्राधिकरणका पूर्व प्रमुख कार्यकारी निर्देशकसमेत रहेका घिसिङले आफ्नो संरक्षणमा ‘उज्यालो नेपाल’ पार्टी दर्ता गराएका थिए। पछि उनले १४ पुसमा राष्ट्रिय स्वतन्त्र पार्टी (रास्वपा) सँग उपसभापति पदमा सहमति गर्दै एकता गरेका थिए।
गैरदलीय सरकारको मन्त्री पदमा रहँदै राजनीतिक दलसँग आबद्ध गतिविधिमा संलग्न भएको आरोप लागेपछि घिसिङको राजीनामाको माग उठ्दै आएको थियो। सामाजिक सञ्जाल र सार्वजनिक तहबाट मन्त्रीहरूको राजनीतिक भूमिकामाथि प्रश्न बढेपछि सोमबार बसेको मन्त्रिपरिषद् बैठकमा प्रधानमन्त्री कार्कीले उनलाई पदबाट हट्न सुझाव दिएको स्रोतको भनाइ छ।
